მარგველაშვილი მზადაა უზენაესი სასამართლოს ახალი თავმჯდომარის შესარჩევად ‘კონსულტაციებისთვის’

პრეზიდენტმა გიორგი მარგველაშვილმა განაცხადა 13 იანვარს, რომ ის მზად არის მოუსმინოს ყველა დაინტერესებულ მხარეს უზენაესი სასამართლოს ახალი თავმჯდომარის შერჩევისა და წარდგენის პროცესში.

უზენაესი სასამართლოს მოქმედ თავმჯდომარეს კოტე კუბლაშვილს უფლებამოსილების 10-წლიანი ვადა 2015 წლის თებერვალში ეწურება. მისი შემცვლელი პრეზიდენტმა უნდა შეარჩიოს და პარლამენტს დასამტკიცებლად წარუდგინოს. კანდიდატის დამტკიცებას სულ ცოტა 76 დეპუტატის მხარდაჭერა სჭირდება.
 
„პრეზიდენტის ინსტიტუტი ღიაა ამ კონსულტაციებისთვის“, – განუცხადა პრეზიდენტმა მარგველაშვილმა ჟურნალისტებს 13 იანვარს, „მე მოვუწოდებ ყველა დაინტერესებულ მხარეს – როგორც სამოქალაქო სექტორში, ასევე პარლამენტში – ჩაერთონ ამ კონსულტაციებში და თავისი პოზიცია გაგვიზიარონ“.

„ბუნებრივია, ეს ჩვენ დაგვეხმარება სწორედ იმ მიზნის განხორციელებაში, რომ დავასახელოთ საუკეთესო კანდიდატი“, – განაცხადა მან.

„მე დაინტერესებული ვარ როგორც საპარლამენტო უმრავლესობის, ასევე საპარლამენტო ოპოზიციის და სამოქალაქო საზოგადოების და ექსპერტების შეხედულებებით. ბუნებრივია, გადაწყვეტილების სირთულე დააწვება პრეზიდენტს“, – განაცხადა მარგველაშვილმა.     

This post is also available in: English (ინგლისური) Русский (რუსული)