17 მაისის ძალადობასთან დაკავშირებით ოთხი პირია დაკავებული
სამართალდამცავებმა 17 მაისს თბილისის ცენტრში მომხდარ ძალადობასთან დაკავშირებით ოთხი პირი დააკავეს პოლიციისადმი დაუმორჩლებლობისა და წვრილმანი ხულიგნობის ფაქტზე, განაცხადა შინაგან საქმეთა სამინისტრომ დღეს შუაღამისას.
ოთხივე პირი ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს, რაც ჯარიმას ან 90 დღემდე ვადით პატიმრობას ითვალისწინებს.
„17 მაისის ინციდენტთან დაკავშირებით გამოძიება გრძელდება. აღძრულია რამდენიმე სისხლის სამართლის საქმე“, – განაცხადა შსს–მ.
მთავარი პროკურორის მოადგილემ შოთა რეხვიაშვილმა განაცხადა 20 მაისს, რომ დიდი რაოდენობით მასალა არსებობს, მათ შორის ვიდეო ჩანაწერები, რომელსაც გამომძიებლების მიერ შესწავლა სჭირდება.
მისი თქმით, საზოგადოება დაინახავს, რომ კონკრეტული პირები დაისჯებიან ჩადენილი ქმედებებისთვის.
This post is also available in: English (ინგლისური) Русский (რუსული)
