თორნიკე გორდაძე ევროატლანტიკურ სტრუქტურებში ინტეგრაციის საკითხებში სახელმწიფო მინისტრად დაინიშნა

თორნიკე გორდაძე ევროატლანტიკურ სტრუქტურებში ინტეგრაციის საკითხებში სახელმწიფო მინისტრი გახდა მას შემდეგ, რაც გიორგი ბარამიძემ ეს თანამდებობა 1 ოქტომბრის საპარლამენტო არჩევნებში მონაწილეობის მიზნით დატოვა.

თორნიკე გორდაძე, რომელიც დღეს სახელმწიფო მინისტრის აპარატის თანამშრომლებს პრემიერ–მინისტრმა ვანო მერაბიშვილმა წარუდგინა, საგარეო საქმეთა მინისტრის მოადგილე იყო 2010 წლის ივნისიდან და ევროკავშირთან ურთიერთობების მიმართულებას ხელმძღვანელობდა.

მთავრობაში მუშაობის დაწყებამდე გორდაძე, რომელიც 15–16 წელი საფრანგეთში ცხოვრობდა, ანატოლიის კვლევის ფრანგული ინსტიტუტის კავკასიის ცენტრის დირექტორი იყო.

გიორგი ბარამიძე, რომელიც სახელმწიფო მინისტრის თანამდებობაზე 2004 წლის დეკემბრიდან მუშაობდა, ბათუმში ნაციონალური მოძრაობის მაჟორიტარი დეპუტატობის კანდიდატად პრეზიდენტმა სააკაშვილმა კვირის დასაწყისში წარადგინა.

This post is also available in: English (ინგლისური) Русский (რუსული)