
შსს: „ქართული ოცნების“ ორი აქტივისტი დაკავებულია კონტრდაზვერვის თანამშრომლის „გადმობირების“ მცდელობისთვის
შინაგან საქმეთა სამინისტრომ 27 ივნისს განაცხადა, რომ ბიძინა ივანიშვილის ოპოზიციური კოალიცია „ქართული ოცნების“ ორი აქტივისტი კონტრდაზვერვის დეპარტამენტის თანამშრომლის „გადმობირების“ მცდელობისთვის დააკავა.
შსს–მ განცხადებაში აღნიშნა, რომ ორი მამაკაცი, რომელთაგანაც ერთი სპეცსამსახურების ყოფილი თანამშრომელია, კონტრდაზვერვის დეპარტამენტის ოპერატიულ თანამშრომელს „ფინანსური ანაზღაურებისა და უსაფრთხოების გარანტიების სანაცვლოდ“ სთხოვდნენ „შინაგან საქმეთა სამინისტროდან ინფორმაციის მოწოდებას დაგეგმილი და მიმდინარე ოპერატიულ-სამძებრო ღონისძიებების თაობაზე“.
„ქართული ოცნების" აფხაზეთის ახალგაზრდული ორგანიზაციის თავმჯდომარე ირაკლი პერტენავა და „ჩვენი საქართველო – თავისუფალი დემოკრატების" აფხაზეთის ორგანიზაციის აღმასრულებელი მდივანი ზურაბ ფიფია „ბრალდებულნი არიან სამსახურებრივი უფლებამოსილების ბოროტად გამოყენების მომზადებაში“, განაცხადა შსს–მ, რომელმაც თავის ვებ–გვერდზე ასევე გამოაქვეყნა საუბრის ფარული ვიდეო ჩანაწერი ორ დაკავებულს და სამინისტროს თანამშრომელს შორის.
ამ განცხადებამდე, დაახლოებით ორი კვირით ადრე შინაგან საქმეთა სამინისტრომ განაცხადა, რომ დააკავა ორი მამაკაცი, რომლებიც, მისი თქმით, პოლიციის თანამშრომლის გადაბირებას ცდილობდნენ, რათა მას მოეძიებინა და მიეწოდებინა ინფორმაცია სტრუქტურაში მიმდინარე ვითარების შესახებ. ამ საქმესთან დაკავშირებით კოალიცია „ქართულმა ოცნებამ“ განაცხადა, რომ ეს ისტორია შეთხზული იყო და იმ კამპანიის შემადგენელ ნაწილს წარმოადგენდა, რომელსაც ხელისუფლება მათ წინააღმდეგ აწარმოებს.