აფხაზი დეპუტატები მოუწოდებენ ბაღაფშს შეწყვიტოს ჟენევის მოლაპარაკებები
აფხაზეთის დე ფაქტო პარლამენტმა მოუწოდა აფხაზეთის ლიდერს სერგეი ბაღაფშს შეწყვიტოს სოხუმის მონაწილეობა ე.წ. ჟენევის პროცესში.
ჟენევის შეხვედრები ტარდება გაეროს ეგიდით, გაეროს გენერალური მდივნის მეგობარი ქვეყნების – საფრანგეთი, გერმანია, დიდი ბრიტანეთი, რუსეთი და აშშ – მონაწილეობით. შეხვედრას ქართული და აფხაზური მხარეებიც ესწრებიან. ამ ფორმატის ბოლო შეხვედრა 18-19 თებერვალს გაიმართა.
”არსებულ ვითარებაში აფხაზეთის რესპუბლიკის პარლამენტი, რომელიც ხელმძღვანელობს აფხაზეთის მოსახლეობის ინტერესებით და შეხედულებებით, მოგიწოდებთ [სერგეი ბაღაფშს] თავი შეიკავოთ გაეროს ეგიდით და მეგობართა ჯგუფის მონაწილეობით მიმდინარე ქართულ-აფხაზური მოლაპარაკებების პროცესში მონაწილეობისგან, სანამ საერთაშორისო თანამეგობრობა არ მისცემს ობიექტურ შეფასებას ქართული მხარის აგრესიულ ქმედებებს და სანამ საქართველო არ შეასრულებს მოსკოვის შეთანხმებით აღებულ ვალდებულებებს [ცეცხლის შეწყვეტისა და ძალთა დაშორიშორების თაობაზე],” – ნათქვამია აფხაზეთის პარლამენტის განცხადებაში.
სოხუმმა მას შემდეგ დაიწყო მეგობართა ჯგუფის გაკრიტიკება, რაც მისმა ოთხმა დასავლელმა წევრმა – აშშ, დიდი ბრიტანეთი, საფრანგეთი და გერმანია – 23 აპრილს ერთობლივი განცხადება გამოქვეყნეს, რომელშიც მოუწოდეს რუსეთს ”გააუქმოს ან არ განახორციელოს თავისი გადაწყვეტილება” აფხაზეთთან და სამხრეთ ოსეთთან ოფიციალური ურთიერთობების დამყარების თაობაზე.