რუსეთის მიერ აფხაზეთის ცნობა ომის გამოცხადებას ნიშნავს – თარგამაძე

პარლამენტის თავდაცვისა და უშიშროების კომიტეტის თავმჯდომარის გივი თარგამაძის განცხადებით, რუსეთის მიერ თვითგამოცხადებული აფხაზეთის დამოუკიდებლობის ცნობა საქართველოსთვის ომის გამოცხადების ტოლფასი იქნება და ”ჩვენ ამ გამოწვევას მივიღებთ”.  

ოფიციალურმა თბილისმა 12 ნოემბერს განაცხადა, რომ რუსეთმა აფხაზეთში რამდენიმე ერთეული მძიმე ტექნიკა და 200-მდე ჩეჩენი წარმოშობის სამხედრო მოსამსახურე შეიყვანა. თუმცა რუსეთის თავდაცვის სამინისტრომ ეს ინფორმაცია უარყო.  ამავდროულად, 

 აშშ-ს სახელმწიფო მდივნის თანაშემწის მოადგილემ ევროპისა და ევრაზიის საკითხებში მეთიუ ბრაიზამ განაცხადა, რომ აშშ-ს მთავრობამ უკვე დააყენა ეს საკითხი რუსეთის ხელისუფლების წინაშე.

”მოსახლეობამ და პოლიტიკურმა სპექტრმა ზუსტად უნდა შეაფასოს ეს საფრთხე… ძალიან მნიშვნელოვანია, რომ თითოეულ ჩვენთაგანსაც ესმოდეს ეს ისე, როგორც არის სინამდვილეში: აფხაზეთის აღიარება რუსეთის მხრიდან ნიშნავს საქართველოსთვის ომის გამოცხადებას და ჩვენ ამ გამოწვევას მივიღებთ,”-  განაცხადა თარგამაძემ პარლამენტის ბიუროს დღევანდელ სხდომაზე, ”ეს ესმის რუსეთს პირველ რიგში და ამიტომ შეჰყავს წინასწარ, მე ვფიქრობ, ეს დამატებითი ძალები [აფხაზეთში]”.

13 ნოემბერს თბილისში პრესკონფერენციაზე საუბრისას მეთიუ ბრაიზამ განაცხადა, რომ იგი ამ ინფორმაციას ვერ დაადასტურებს და ვერც უარყოფს”. 

თუმცა, მან იქვე დასძინა: ”ჩვენ მაშინვე დავაყენეთ ეს საკითხი რუსეთის მთავრობის წინაშე, რათა მიგვენიშნებინა, რომ ჩვენ თვალყურს ვადევნებთ და რუსი კოლეგებისგან მოველით, რომ საქართველოს ტერიტორიულ მთლიანობასთან დაკავშირებით თავიანთ ვალდებულებებს დაიცავენ”. 

”ზოგჯერ სხვა ქვეყნების მიერ კეთდება განცხადებები, რომელშიც ცდილობენ, რომ სათავისოდ გამოიყენონ [საქართველოში] არსებული სიტუაცია; ერთმა ოფიციალურმა წარმომადგენელმა რეგიონიდან განაცხადა: რა თქმა უნდა, აფხაზეთი დამოუკიდებელია და ის უნდა იქნას აღიარებული… ამგვარი ნაბიჯები აბსოლუტურად მიუღებელი, საშიში და არასაჭიროა”.

მოსკოვის მერმა იური ლუჟკოვმა ცოტა ხნის აფხაზეთის დამოუკიდებლობის აღიარებისკენ მოუწოდა.  

This post is also available in: English (ინგლისური) Русский (რუსული)