არასამთავრობოები აჭარის მაუწყებელში არსებული ვითარების გამო საერთაშორისო საზოგადოებას მიმართავენ

38 არასამთავრობო ორგანიზაცია აჭარის მაუწყებელში „მიმდინარე საგანგაშო პროცესებს“ ეხმიანება და საერთაშორისო ორგანიზაციებს მათი მანდატის ფარგლებში, „რეაგირებასა და მაუწყებლის დამოუკიდებლობისთვის პოლიტიკურ მხარდაჭერას“ სთხოვს.

17 მარტს გავრცელებულ ერთობლივ მიმართვაში უფლებადამცველები საერთაშორისო საზოგადოებას სთხოვენ:

• დაინტერესდნენ აჭარის საზოგადოებრივ მაუწყებელში მიმდინარე პოლიტიკური, სარედაქციო და შრომითი უფლებების ხელყოფასთან დაკავშირებული პროცესებით და საქართველოს მთავრობასთან მიმდინარე ყველა რელევანტურ პოლიტიკურ და საერთაშორისო ფორმატებში დააყენონ აჭარის მაუწყებლის საკითხი;
• მანდატის ფარგლებში მიიღონ შესაბამისი ზომები (საჯარო გამოხმაურება, მიმართვა მთავრობასთან და ა.შ.) აჭარის საზოგადოებრივი მაუწყებლის ჟურნალისტების შრომითი უფლებებისა და გამოხატვის თავისუფლების დასაცავად და მაუწყებლის დამოუკიდებლობის წინააღმდეგ მიმართული პროცესების შესაჩერებლად.

ხელმომწერები მიმართვაში ყურადღებას მაუწყებლის ახალი დირექტორის მხრიდან მაუწყებელში „კრიტიკული შინაარსის საკვანძო რგოლის“ არსებითად დასუსტების მცდელობაზე მიუთითებენ, რაც მათივე შეფასებით, „ახალი ამბების სამსახურისა და მნიშვნელოვანი პოზიციების მქონე თანამშრომლების“ სამსახურიდან გათავისუფლებით ან „სხვა ნაკლებად გავლენიან სამსახურებში“ გადაყვანით გამოიხატა.

„აღნიშნული გადაწყვეტილებები, რომელიც სარედაქციო გუნდში მაღალი პოზიციებისა და ახალი მენეჯმენტის მიმართ კრიტიკული დამოკიდებულებების მქონე თანამშრომლებს შეეხოთ, შრომითი უფლებების უხეში დარღვევის მიღმა, მაუწყებლის სარედაქციო დამოუკიდებლობის ხელყოფის და მასზე კონტროლის მოპოვების აშკარა ნიშნებს ატარებს“, – აცხადებენ არასამთავრობოები.

მათვე განცხადებით, „მაუწყებელში შექმნილი მძიმე სამუშაო გარემო და მენეჯმენტის მიერ მიღებული უსამართლო გადაწყვეტილებები“ თანამშრომლებში აჩენს „დასაბუთებულ შიშებს, რომ დამოუკიდებელი კადრების წმენდისა და სარედაქციო პოლიტიკაში ინტერვენციის პრაქტიკა გაგრძელდება“, რაც „მაუწყებელზე ხელისუფლების კონტროლს საბოლოოდ გააფორმებს“.

„მაუწყებლის დამოუკიდებლობის დასუსტება გააქრობს იმ ღია, კრიტიკულ საზოგადოებრივ სივრცეს, რომელიც აჭარის მაუწყებელმა ბოლო პერიოდში შექმნა და რომელიც არაპრივილეგირებული, ჩაგრული სოციალური ჯგუფებისთვის მათი საჭიროებების, წუხილებისა და ინტერესების რეპრეზენტაციის რესურსი გახდა“, – აღნიშნავენ უფლებადამცველები.

მათივე შეფასებით, „აჭარის მაუწყებელში მიმდინარე პროცესი არსებული პოლიტიკური გარემოს ზოგად კონტექსტში უნდა იქნას დანახული, სადაც აშკარაა ხელისუფლების ინტერესი ძალაუფლების შენარჩუნების მიზნით, დაასუსტოს კრიტიკულ პოზიციებზე მყოფი პოლიტიკური, სამოქალაქო და მედიაჯგუფები და საკუთარ კონტროლს დაუქვემდებაროს“.

არასამთავრობოები ასევე აღნიშნავენ, რომ ბოლო თვეებში, „საზოგადოება აკვირდება აშკარად მტრულ რიტორიკას და სამართლებრივ დავებს“, ისეთი „კრიტიკული მედიის“ მიმართ, როგორებიცაა: „ტელეკომპანია პირველი“, „მთავარი არხი“ და „ფორმულა“. მათივე შეფესებით, ეს რიტორიკა „ხელისუფლების მხრიდან მომდინარეობს“.

ასევე წაიკითხეთ:

• აჭარის ტელევიზიის წამყვანი სამსახურიდან გაათავისუფლეს
• აჭარის მაუწყებლის გათავისუფლებული და მოქმედი თანამშრომლები სამართლებრივ დავას იწყებენ
• „რეპორტიორები საზღვრებს გარეშე“ აჭარის ტელევიზიაში მიმდინარე მოვლენების გამო შეშფოთებას გამოხატავს
• „აჭარის მაუწყებელში სუს-ია“ – ჟურნალისტების მდუმარე პროტესტი
• აჭარის მაუწყებლის თანამშრომლების მხარდასაჭერად პარლამენტის წინ აქცია გაიმართა
• კოალიცია მედიის ადვოკატირებისთვის აჭარის მაუწყებლის თაობაზე საერთაშორისო ორგანიზაციებს მიმართავს
• „რეპორტიორები საზღვრებს გარეშე“ შეშფოთებულია ნათია ზოიძის „ზეწოლის“ გამო გადადგომით
• აჭარის მაუწყებლის ალტერნატიული პროფკავშირი დირექტორის მოადგილის პოსტიდან წასვლას ეხმაურება
• აჭარის მაუწყებლის თანამშრომლები ახალ დირექტორს „შანტაჟში“ ადანაშაულებენ
• აჭარის საზოგადოებრივი მაუწყებლის დირექტორად გიორგი კოხრეიძე აირჩიეს
• აჭარის მაუწყებლის მრჩეველთა საბჭომ ნათია კაპანაძე დირექტორის თანამდებობიდან გადააყენა

This post is also available in: English (ინგლისური) Русский (რუსული)