ივნისიდან სატელეფონო და მობილური ქსელების ნუმერაცია იცვლება
ივნისის თვეში სატელეფონო და მობილური ქსელების ნუმერაცია შეიცვლება, აცხადებს საქართველოს კომუნიკაციების ეროვნული კომისია 11 მაისს.
კერძოდ, 4 ივნისის 00:00 საათიდან ფიქსირებული ქსელების ადგილობრივი სატელეფონო სადგურების ნუმერაცია შემდეგნაირად შეიცვლება:
- თბილისში ექვსნიშნა ნუმერაცია შეიცვლება შვიდნიშნა ნუმერაციით და არსებულ სააბონენტო ნომერს დაემატება პირველ ციფრად – 2; მაგალითად, სააბონენტო ნომერი 76XXXX გახდება 276 XXXX;
- რუსთავში გეოგრაფიული კოდი 34 შეიცვლება 341-თ, ხოლო თავად ქ. რუსთავის ადგილობრივ სატელეფონო სადგურებში, სააბონენტო ნომრის პირველი ციფრი – 1, შეიცვლება ციფრი 2-ით; მაგალითად სააბონენტო ნომერი 15 XXXX გახდება 25 XXXX; ქალაქ რუსთავში სხვა გეოგრაფიული ზონიდან და მობილური ქსელებიდან დასარეკად გამოყენებულ უნდა იქნას ნუმერაციის შემდეგი კომბინაცია – 341-2X-XX-XX;
- ყველა სხვა მუნიციპალიტეტსა და თვითმმართველ ქალაქში ხუთნიშნა ნუმერაცია შეიცვლება ექვსნიშნა ნუმერაციით; ადგილობრივ სატელეფონო ნომერს პირველ ციფრად ემატება ციფრი – 2; მაგალითად, ქუთაისში, სატელეფონო ნომერი 3XXXX გახდება 23XXXX; ქალაქ ქუთაისში სხვა გეოგრაფიული ზონიდან და მობილური ქსელებიდან დასარეკად გამოყენებულ უნდა იქნას ნუმერაციის შემდეგი კომბინაცია – 421 23XXXX.
20 ივნისის 00:00 საათიდან იცვლება მობილური ელექტრონული საკომუნიკაციო კავშირის ქსელების ნუმერაცია და მობილურ სააბონენტო ნომერს პირველ ციფრად ემატება – 5. მაგალითად, სააბონენტო ნომერი 77-XX-XX-XX გახდება 577-XX-XX-XX; ფიქსირებული სატელეფონო ნომრიდან (მაგალითად, სილქნეტის, ახტელის ან მაგთიფიქსის ნომრიდან) მობილურ ქსელში დასარეკად გამოყენებული უნდა იქნას ციფრების შემდეგი კომბინაცია: 8-577- XX-XX-XX, ხოლო მობილურ ქსელებში სატელეფონო ზარის შესრულებისას (მაგთიკომი, ჯეოსელი, მობიტელი – „ბილაინი“) – ციფრების შემდეგი კომბინაცია: 577-XX-XX-XX;
27 ივნისს 00:00 საათიდან შეიცვლება ფიჭური პრინციპით მომუშავე ფიქსირებული სატელეფონო ქსელების ნუმერაცია (მაგთიფიქსი, სილქნეტის უსადენო ტელეფონი) და უსადენო ფიქსირებულ სატელეფონო ნომერს პირველ ციფრად დაემატება – 7. მაგალითად, სააბონენტო ნომერი 90-XX-XX-XX გახდება 790-XX-XX-XX; ფიქსირებული სადენიანი სატელეფონო ნომრიდან (მაგალითად, სილქნეტის, ახტელის ნომრიდან) ან მობილური ქსელიდან უსადენო ფიქსირებულ სატელეფონო ნომერზე დასარეკად გამოყენებული უნდა იქნას ციფრების შემდეგი კომბინაცია: 8-790-XX-XX-XX, ხოლო უსადენო ფიქსირებულ ქსელებში (მაგთიფიქსი, სილქნეტის უსადენო ტელეფონი) სატელეფონო ზარის შესრულებისას, ციფრების შემდეგი კომბინაცია: 790-XX-XX-XX.