გელა ბეჟუაშვილი ვაშინგტონში გაემგზავრა

საქართველოს საგარეო საქმეთა მინისტრი გელა ბეჟუაშვილი 15 დეკემბერს აშშ-ს ეწვევა. ვიზიტის ფარგლებში შეხვედრები გაიმართება აშშ-ის სახელმწიფო მდივანთან კონდოლიზა რაისთან და თავდაცვის დეპარტამენტის მდივანთან დონალდ რამსფელდთან.

საქართველოს საგარეო უწყების ცნობით, შეხვედრების დროს განიხილება საქართველო-აშშ-ის ორმხრივი ურთიერთობების პერსპექტივები, აშშ-ის აქტიური ჩართვა სამხრეთ ოსეთის სამშვიდობო გეგმის რეალიზაციაში, ბრძოლა საერთაშორისო ტერორიზმის წინააღმდეგ, დემოკრატიის განვითარება საქართველოში და მთლიანად რეგიონში. 

ასევე დაგეგმილია გელა ბეჟუაშვილის სიტყვით გამოსვლა “კარნეგის ფონდში“ თემაზე “დემოკრატიული ცვლილებები საქართველოში“.

ვაშინგტონში ვიზიტამდე საქართველოს საგარეო საქმეთა მინისტრი ბიუსელს სტუმრობდა, სადაც ევროკავშირის “ტოიკასთან” ევროპული სამეზობლო პოლიტიკის საქართველოს სამოქმედო გეგმა, სამხრეთ ოსეთის სამშვიდობო გეგმა და საზღვრის მართვის სფეროში საქართველო-ევროკავშირის თანამშრომლობის საკითხები განიხილა.

This post is also available in: English (ინგლისური) Русский (რუსული)