რუსეთის საგარეო უწყება პარლამენტის დადგენილებაზე რეაგირებას აპირებს

რუსეთის საგარეო საქმეთა მინისტრმა სერგეი ლავროვმა განაცხადა, რომ როგორც კი გაეცნობა 11 ოქტომბერს საქართვლოს პარლამენტის მიერ მიღებულ დადგენილებას აფხაზეთისა და სამხრეთ ოსეთის კონფლიქტის ზონებში რუსი სამშვიდობოების საქმიანობის გაგრძელების პირობების თაობაზე, რუსეთის საგარეო საქმეთა სამინისტროს რეაქცია არ დააყოვნებს, იუწყება 12 ოქტომბერს “ინტერფაქსი“.

“ჯერ დადგენილების ტექსტს არ გავცნობივარ, მაგრამ როგორც კი გავეცნობი, მაშინვე იქნება [რუსეთის საგარეო უწყების] რეაქცია“, – განაცხადა ლავროვმა მას შემდეგ, რაც იგი რუსეთის ფედერაციის საბჭოს დახურულ სხდომაზე ანგარიშით წარსდგა.

პარლამენტის დადგენილება, რომელიც 11 ოქტომბერს პლენარულ სხდომაზე ერთხმად დამტკიცდა, საქართველოს მთავრობას ავალებს მიიღოს ზომები სამხრეთ ოსეთის და აფხაზეთის კონფლიქტების ზონებიდან რუსი სამშვიდობოების გაყვანის თაობაზე, თუ სამშვიდობო ძალების საქმიანობა სამხრეთ ოსეთსა და აფხაზეთში არ გამოსწორდება შესაბამისად 2006 წლის 10 თებერვლისა და 2006 წლის 1 ივლისისთვის.

ლავროვის განცხადებით, საქართველოს კონფლიქტის ზონებში სამშვიდობოები საკუთარი სიცოცხლის ფასად უზრუნველყოფენ სისხლისღვრის განუახლებლობას.

“ეხლა მნიშვნელოვანია მკვეთრი მოქმედებებისაგან თავის შეკავება და თანდათან [კონფლიქტების] მხარეებს  შორის ნდობის აღდგენა. ჩვენ, როგორც შუამავალი მხარე, ყველაფერს ვაკეთებთ მათ შორის ნდობის გამყარებისათვის“, – აცხადებს სერგეი ლავროვი.