ზურაბიშვილი: „ქართულ ქარტიას“ შეუძლია საქართველო ევროკავშირის გზაზე დააბრუნოს

23 სექტემბერს გამართულ ბრიფინგზე საქართველოს პრეზიდენტმა სალომე ზურაბიშვილმა გახარია-ხაზარაძეს შორის გამართული მოლაპარაკებები მიმოიხილა და განაცხადა, რომ მიუხედავად იმისა, რომ შეთანხმება ვერ იქნა მიღწეული, ამან კომპრომისის მცდელობის პრეცედენტი შექმნა.

მისი თქმით, საქართველოს პოლიტიკური განვითარების ყველაზე დიდი დაბრკოლება არის კონსენსუსის კულტურის ნაკლებობა, რთული წარსული, უნდობლობა და, ზოგჯერ, კონსპირაციული აზროვნება. ამ კონტექსტში მან ხაზი გაუსვა „ქართული ქარტიის“, როგორც ერთადერთი დოკუმენტის, გადამწყვეტ როლს, რომელზეც ყველა პროდასავლური პარტია ამ ხარვეზების მიუხედავად თანხმდება. მან ხაზგასმით აღნიშნა, რომ ქარტიაზე შეთანხმება მხოლოდ ხელმოწერა არ არის, არამედ ეს არის შეთანხმება კონკრეტულ ქმედებათა კურსზე, რათა საქართველო ევროკავშირისკენ მიმავალ გზას დაუბრუნდეს.

„არავის მივცემ უფლებას [ოპოზიციურ კამპანიაში] არ ილაპარაკონ დღე და ღამე ქარტიაზე“, – განაცხადა ზურაბიშვილმა და აღნიშნა, რომ პარტიები, როგორც ჩანს, ნაკლებად საუბრობენ ქარტიაზე, რომელიც, მისი თქმით, „არის ერთობის ინსტრუმენტი“. პრეზიდენტმა ასევე აღნიშნა, რომ „ქართული ქარტია“ ევროპაში დაბრუნების საგზაო რუკაა.

პრეზიდენტის თქმით, არჩევნების შემდეგ ოთხმა ხელმომწერმა კოალიციამ უნდა გააუქმოს „ქართული ოცნების“ მიერ ცოტა ხნის წინ მიღებული ყველა ანტიდემოკრატიული კანონი, შეიწყალოს ისინი, ვინც დააჯარიმეს ან დააკავეს საპროტესტო აქციის გამო, და შექმნას ტექნიკური მთავრობა, რომელიც მოკლე ვადით, შესაძლოა ერთი წლით, იმუშავებს და ჩამოაყალიბებს პოლიტიკურ სისტემას სამართლიანი დემოკრატიული კონკურენციის უზრუნველსაყოფად.

პრეზიდენტმა ზურაბიშვილმა კიდევ ერთხელ გაამახვილა ყურადღება მომავალი არჩევნების მნიშვნელობაზე და ამომრჩეველს სრული მობილიზაციისკენ მოუწოდა. მისი თქმით, ქართველებმა სულაც არ უნდა იფიქრონ იმაზე, თუ რომელ ოპოზიციურ პარტიას მისცენ ხმა, არამედ ყურადღება უნდა გაამახვილონ საქართველოს ევროპული მომავლის იდეაზე.

პრეზიდენტის თქმით, „ქართული ოცნების“ ნამდვილი ბუნება დღითიდღე უფრო ცხადი ხდება და მმართველი პარტია არათუ პრორუსული, არამედ უბრალოდ რუსული პარტია. „არაფერი არ გაკეთებულა ხმების მოსაპოვებლად, რასაც ჰქვია წინასაარჩევნო კამპანია, რომ ვიღაცას მოეწონო, ვიღაცა მოიზიდო, მოხიბლო. არა, კამპანიაა ერთი და მხოლოდ ერთი: შიში, მუქარა, რევანშის დაპირება, ეს იქნება დაჭერები თუ სხვა“, – განაცხადა მან.

ასევე წაიკითხეთ:

• 23/09/2024 – პარტიამ „გახარია – საქართველოსთვის“ პრეზიდენტის „ქართულ ქარტიას“ ხელი მოაწერა

This post is also available in: English (ინგლისური) Русский (რუსული)