ირანის ელჩი საქართველოს პარლამენტის საგარეო ურთიერთობათა კომიტეტში გამოსვლას ითხოვს

ირანის ელჩმა საქართველოში, მაჰმუდ ადიბმა დაგმო საქართველოს პარლამენტის საგარეო ურთიერთობათა კომიტეტის სხდომაზე ისრაელის ელჩის, ჰადას მეიცადის გამოსვლა, საქართველოს ხელისუფლებას პალესტინის მხარდაჭერისკენ მოუწოდა და კომიტეტის სხდომაზე გამოსვლა მოითხოვა.

• 12/10/2023 – საგარეო ურთიერთობათა კომიტეტში ისრაელის ელჩს მოუსმინეს

„კატეგორიულად ვგმობ სიონისტური რეჟიმის ელჩის მიერ საქართველოს პარლამენტში გამოთქმულ უსაფუძვლო ბრალდებებს ირანის წინააღმდეგ. ირანი მხარს უჭერს პალესტინის უფლებებს, მაგრამ არ არის ჩართული მათ საპასუხო ქმედებებში, ვინაიდან ამ ქმედებებს თავად პალესტინელები განსაზღვრავენ“, – დაწერა ირანის ელჩმა Twitter-ზე 13 ოქტომბერს. მისი თქმით, ირანი ელის, რომ საქართველო, როგორც „ოკუპაციის ხანგრძლივი მოწინააღმდეგე, პალესტინელი ხალხის გვერდზე დადგება თავისუფლების, სამართლიანობისა და მათი მიწის ოკუპაციის დასრულების ძიების გზაზე“.

In the spirit of fairness and diplomacy, I've formally requested @shpapuashvili an equal opportunity to address the Foreign Relations Committee.
It's essential to clarify our stance after false accusations were made by the Ambassador of the Israeli regime. https://t.co/nvJFwMrT7r

— Mahmoud Adib (@AmbassadorAdib) October 13, 2023

ირანის ელჩმა ასევე დაწერა, რომ „სამართლიანობისა და დიპლომატიური სულისკვეთებით“, მან პარლამენტის თავმჯდომარეს, შალვა პაპუაშვილს სთხოვა თანაბარი შესაძლებლობა საგარეო ურთიერთობათა კომიტეტში გამოსვლისთვის, ვინაიდან „აუცილებელია, განვმარტოთ ჩვენი პოზიცია ისრაელის რეჟიმის ელჩის მცდარი ბრალდებების შემდეგ“.  

საქართველოს პარლამენტმა ირანის ელჩს საჯაროდ არ უპასუხა.

ისრაელის ელჩს საქართველოში, ჰადას მეიცადს საგარეო ურთიერთობათა კომიტეტის სხდომაზე 12 ოქტომბერს მოუსმინეს. ჰადას მეიცადმა  „ჰამასის“ ტერორისტების მიერ 1300-ზე მეტი ადამიანის სიცოცხლეების ტრაგიკულ დანაკარგზე ისაუბრა და აღნიშნა, რომ „ჰამასის“ მიერ განხორციელებული ეს თავდასხმა მიმართულია ყველაფრის წინააღმდეგ, რისაც ისრაელს, საქართველოს, ამერიკასა და დანარჩენ ცივილიზებულ სამყაროს სჯერა.

ისრაელის ელჩმა განაცხადა, რომ „ჰამასი“ ვერ შეძლებდა თავდასხმის განხორციელებას ირანის ფინანსური, ლოგისტიკური თუ სხვა სახის დახმარების გარეშე. მან ასევე განაცხადა, რომ „ჰამასის“ შესაძლებლობებსა და მათ გამოყენებაზე პასუხისმგებლობა ირანს ეკისრება.

ასევე წაიკითხეთ:

• 07/10/2023 – საქართველოს ხელისუფლება ისრაელზე „ჰამასის“ თავდასხმას გმობს

This post is also available in: English (ინგლისური) Русский (რუსული)