Placeholder canvas
ახალი ამბები

ხელვაჩაურის სამხედრო გაწვევის სამსახურის უფროსი ქრთამის აღებისთვის დააკავეს

საქართველოს სახელმწიფო უსაფრთხოების სამსახურმა (სუს) 11 აგვისტოს განაცხადა, რომ წინასწარი შეთანხმებით ჯგუფურად ქრთამის აღების ფაქტზე ხელვაჩაურის მუნიციპალიტეტის მერიის სამხედრო აღრიცხვის, გაწვევისა და მობილიზაციის სამსახურის უფროსი თენგიზ ქიქავა დააკავეს.

სუს-ის განცხადებით, ქიქავას ოზურგეთის მუნიციპალიტეტის მერიის სამხედრო აღრიცხვის, გაწვევისა და მობილიზაციის სამსახურის აწ უკვე ყოფილი უფროსი (ი.ლ) დაუკავშირდა (სუს-ის ცნობით, იგი დანაშაულის ჩადენისას, სამსახურის ჯერ კიდევ მოქმედი უფროსი იყო, თუმცა თანამდებობიდან ერთი თვის წინ გაათავისუფლეს) და ერთ-ერთი მოქალაქისთვის სამხედრო სავალდებულო სამსახურში გაწვევის არაოფიციალურად გადავადება სთხოვა.

სუს-ის განმარტებით, დასახელებული პირები შეთანხმდნენ და შუამავლის (ბ.გ) დახმარებით, ერთ-ერთ მოქალაქეს სამხედრო სამსახურის გადავადებისთვის ქრთამის სახით 1 500 ლარი გამოართვეს. აღებული ქრთამიდან ოზურგეთის გაწვევის სამსახურის მაშინდელმა უფროსმა 200 ლარი შუამავალ პირს მისცა, 500 ქიქავას, 800 კი – თავად დაიტოვა.

ქიქავას მიმართ გამოძიება წინასწარი შეთანხმებით, ჯგუფის მიერ ქრთამის აღებაში თანამონაწილების მუხლებით მიმდინარეობს (სსკ-ის 25-ე; 338-ის, მე-2-ის – „გ“). მას აღკვეთის ღონისძიების სახით წინასწარი პატიმრობა უკვე შეუფარდეს. ბრალის დამტკიცების შემთხვევაში, ქიქავას 7-11 წლამდე პატიმრობა ემუქრება.

მანამდე,, 9 აგვისტოს, სუს-ში განაცხდეს, რომ ამავე საქმეზე ოზურგეთის მუნიციპალიტეტის მერიის სამხედრო აღრიცხვის, გაწვევისა და მობილიზაციის სამსახურის აწ უკვე ყოფილი უფროსი და მასსა და ქიქავს შორის შუამავალი პირი დააკავეს.

This post is also available in: English (ინგლისური) Русский (რუსული)

მსგავსი/Related

Back to top button