Placeholder canvas
ახალი ამბები

ერგნეთში IPRM-ის 99-ე შეხვედრა გაიმართა

ცხინვალის რეგიონთან საოკუპაციო ხაზის მახლობლად მდებარე სოფელ ერგნეთში 27 აპრილს ინციდენტების პრევენციისა და მათზე რეაგირების მექანიზმის (IPRM) 99-ე შეხვედრა გაიმართა. 

საქართველოში ევროკავშირის სადამკვირვებლო მისიამ, რომელიც ერგნეთის შეხვედრების ფასილიტატორიაგანაცხადა, რომ შეხვედრაზე „ყურადღება სტაბილიზაციისა და ნორმალიზაციის საკითხებზე გამახვილდა – მათ შორის, ადმინისტრაციურ სასაზღვრო ხაზზე „ბორდერიზაციის“ პროცესებზე, მოქალაქეთა დაკავებების შემთხვევებსა და COVID-19 პანდემიის ფართო შედეგებზე“.

შეხვედრის ფასილიტატორებმა – ევროკავშირის სადამკვირვებლო მისიის ხელმძღვანელმა, მარეკ შჩიგელმა და ეუთოს მოქმედი თავმჯდომარის სპეციალურმა წარმომადგენელმა სამხრეთ კავკასიაში ანიკა სოდერმა გადაადგილების თავისუფლებასთან და პანდემიის სხვა შეზღუდვებთან დაკავშირებული ბოლოდროინდელი ცვლილებები აღნიშნეს. მათ ორივე მხარეს მოუწოდეს კოვიდ-19-ის პანდემიის უარყოფითი ზემოქმედებით და გამშვები პუნქტების ჩაკეტვით გამოწვეული სოციალურ-ეკონომიკური პრობლემების გადაჭრაზე იზრუნონ.

შეხვედრის შემდეგ სახელმწიფო უსაფრთხოების სამსახურმა განაცხადა, რომ თბილისმა „მკაცრად“ მოითხოვა უკანონოდ დაკავებული პირების, მათ შორის ზაზა გახელაძის, „უპირობოდ” გათავისუფლება. „ამ კუთხით მუშაობა გრძელდება და რაც მთავარია, დიალოგის გაგრძელებაზე თანხმობაა“, აღნიშნა სუს-ის საინფორმაციო-ანალიტიკური დეპარტამენტის დირექტორის მოადგილემ ირაკლი ანთაძემ.

აფხაზეთის ავტონომიური რესპუბლიკის და ყოფილი სამხრეთ ოსეთის ავტონომიური ოლქის საკითხთა დეპარტამენტის უფროსმა ზვიად ზვიადაძემ განაცხადა, რომ ადგილზე სასოფლო-სამეურნეო სამუშაოების დაწყებასთან დაკავშირებით ტექნიკური შეხვედრები დაიგეგმა, რათა უსაფრთხოების გარემო მაქსიმალურად დაცული იყოს და სარწყავი არხები, რომელიც „უდიდესი პრობლემაა რეგიონისთვის“, მოწესრიგდეს.

ოსური მედიის ცნობით, შეხვედრაზე ცხინვალის წარმომადგენელმა, იგორ კოჩიევმა თბილისი „საჰაერო სივრცის” დრონების გამოყენებით დარღვევაში დაადანაშაულა და დასძინა, რომ ქართველი პოლიციელები „პროვოკაციის“ პრევენციისთვის არაფერს აკეთებენ. კოჩიევმა აღნიშნა, რომ საქართველოს წარმომადგენლების განცხადებით, დრონებს მოქალაქეები იყენებდნენ, ხოლო პოლიციის თანამშრომლები გაშვების ადგილზე იმყოფებოდნენ.

ერგნეთის მომდევნო შეხვედრა 14 ივნისის კვირაში დაიგეგმა.

ინციდენტების პრევენციისა და მათზე რეაგირების მექანიზმი ჟენევის საერთაშორისო მოლაპარაკებების ფარგლებში შეიქმნა და ის საქართველოს, ოკუპირებული აფხაზეთისა და ცხინვალის რეგიონის წარმომადგენლების, ასევე ადგილზე მყოფი რუსი მესაზღვრეების ჩართულობით, ორ რეგიონში უსაფრთოხების საკითხების განხილვას ისახავს მიზნად.

ასევე წაიკითხეთ:

This post is also available in: English (ინგლისური) Русский (რუსული)

მსგავსი/Related

Back to top button