სააღდგომოდ მთავრობა ახალ შეზღუდვებს აწესებს

საქართველოს მთავრობის უწყებათაშორისი საკოორდინაციო საბჭოს დღევანდელი განცხადებით, აღდგომის სადღესასწაულო დღეებში სასაფლაოებზე გასვლა შეიზღუდება, სასაფლაოებთან მისასვლელი გზები კი ჩაიკეტება.

საკოორდინაციო საბჭოს გადაწყვეტილებით, 3-დან 12 მაისის ჩათვლით, შეიზღუდება მუნიციპალური ტრანსპორტის მოძრაობაც. მანამდე მთავრობამ გადაადგილების შეზღუდვის მიზნით 4-11 მაისი უქმე დღეებად გამოაცხადა.  

ამასთან, მხოლოდ ერთი ღამე, სააღდგომო ლიტურგიასთან დაკავშირებით, გადაადგილებაზე დაწესებული შეზღუდვა 1 მაისის 23:00 საათიდან 2 მაისის 04:00 საათამდე იმოქმედებს – ნაცვლად არსებული 21:00-დან 05:00 საათამდე პერიოდისა.  

„საქართველოს საპატრიარქოსთან კომუნიკაციის შედეგად, სადღესასწაულო ლიტურგია ტაძრებში ეპიდემიოლოგიური უსაფრთხოების ნორმების მაქსიმალური დაცვით ჩატარდება; მათ შორის, ტაძრებში უზრუნველყოფილი იქნება გახმოვანების სისტემა, დაცული იქნება სოციალური დისტანცია და პირბადის მოხმარების წესი“, – აცხადებს უწყებათაშორისი საკოორდინაციო საბჭო.  

ამავე ინფორმაციით, იმუნიზაციის მსოფლიო კვირეულთან დაკავშირებით, მიმდინარე კვირიდან ვაქცინაციის პროცესში საქართველოს მთავრობისა და პარლამენტის წევრები ჩაერთვებიან.  

26 აპრილის მდგომარეობით, ქვეყანაში (ოკუპირებული ტერიტორიების გამოკლებით) კოვიდ-19-ის სულ 304 272 შემთხვევაა დადასტურდა. ამას გარდა, სამშობლოში სამკურნალოდ ქვეყნის გარეთ დაინფიცირებული 41 მოქალაქეა გადმოიყვანეს. ამათგან, 287 029 ინფიცირებული უკვე სრულად გამოჯანმრთელდა, 4 043 კი – გარდაიცვალა. აქტიური შემთხვევების რაოდენობა დღეისთვის 13 174-ს შეადგენს. 15 მარტიდან მოყოლებული, ქვეყანაში კოვიდ-19-ზე 38 553 ადამიანი აიცრა.  

This post is also available in: English (ინგლისური) Русский (რუსული)