სასამართლომ ზუგდიდში „საქართველოს ბანკზე“ თავდამსხმელის ძმას წინასწარი პატიმრობა მიუსაჯა

ზუგდიდში „საქართველოს ბანკზე“ თავდამსხმელის, ბადრი ესებუას ძმას – ბიძინა ესებუას რომელიც სამართალდამცველებმა ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო შეძენა-შენახვა-ტარების ბრალდებით დააკავეს, ზუგდიდის რაიონულმა სასამართლომ 14 დეკემბერს წინასწარი პატიმრობა შეუფარდა.

შსს-მ ბიძინა ესებუა 12 დეკემბერს დააკავა. უწყების ცნობით, სამართალდამცველებმა მისი ავტომანქანის ჩხრეკისას 2 ხელყუმბარა, ავტომატური ცეცხლსასროლი იარაღისთვის განკუთვნილი ვაზნები, საძილე ტომარა, კვების პროდუქტები და ტანსაცმელი ამოიღეს.

უწყების ცნობით, დაკავებულზე თვალთვალი მიმდინარეობდა, რადგანაც „არსებობდა ვარაუდი“, რომ მას მიმალვაში მყოფ ძმასთან ჰქონდა კონტაქტი და მისთვის სხვადასხვა ნივთი უნდა გადაეცა.

საქმეზე გამოძიება სისხლის სამართლის კოდექსის 236-ე მუხლით მიმდინარეობს, რაც საბრძოლო მასალის, ფეთქებადი ნივთიერების და ასაფეთქებელი მოწყობილობის მართლსაწინააღმდეგო შეძენა-შენახვა-ტარებას გულისხმობს და 4-დან 7 წლამდე ვადით თავისუფლების აღკვეთას ითვალისწინებს.

დაკავებულის ადვოკატის განცხადებით, ესებუა ბრალს არ აღიარებს და ამბობს, რომ მას ავტომობილში ხელყუმბარა და საბრძოლო მასალა პოლიციელებმა ჩაუდეს. დაკავებულის მამამამ მედიასთან საუბარში ასევე თქვა, მის შვილს ცეცხლსასროლი იარაღი და ხელყუმბარა არ ჰქონია. მისივე თქმით დაკავებულს კონტაქტი არც მიმალვაში მყოფ ძმასთან ჰქონდა.

საქმეზე წინასასამართლო სხდომა 20 იანვარს გაიმართება. დაცვის მხარე სასამართლოს მიერ დღეს მიღებული გადაწყვეტილების ზემდგომ ინსტანციაში გასაჩივრებას გეგმავს.

This post is also available in: English (ინგლისური) Русский (რუსული)