ახალი ამბები

ქეთევან ციხელაშვილი ოკუპირებულ ცხინვალის რეგიონში არსებულ ჰუმანიტარულ კრიზისს ეხმაურება

Tags

შერიგებისა და სამოქალაქო თანასწორობის საკითხებში სახელმწიფო მინისტრის ქეთევან ციხელაშვილის განცხადებით ოკუპირებული ცხინვალის რეგიონში „რეალური ჰუმანიტარული კრიზისია“, რომელიც მინისტრის შეფასებით, „დღითიდღე მძიმდება“.

ოკუპირებულ ცხინვალში სასურსათო მაღაზიების პროდუქტისგან დაცარიელების და ჰუმანიტარული კრიზისის შესახებ ადგილობრივი მედიასაშუალებები იუწყებიან. მათი ინფორმაციით, დეფიციტია რძის პროდუქტებზე, ბურღულეულზე და ბავშვთა კვებაზე.

ოკუპირებული ცხინვალის საინფორმაციო სააგენტო „რეს“-ის ინფორმაციით, უკვე ერთი კვირაა, „სამხრეთ ოსეთი-რუსეთი საზღვარზე“ პროდუქტებით დატვირთულ მანქანებს არ ატარებენ და ამის მიზეზად ახალი კანონი ასახელებენ. კერძოდ, ჩრდილოეთ ოსეთის მებაჟეები ცხინვალისკენ მიმავალ ტვირთებზე ევრაზიული საბაჟო კავშირის შესაბამისი დოკუმენტაციის გაფორმებას ითხოვენ.

„რეს“-ისვე ინფორმაციით, საკითხის მოსაგვარებლად „სამხრეთ ოსეთის ხელისუფლებას“ რუს კოლეგებთან მოლაპარაკებები აქვს.

ქეთევან ციხელაშვილის შეფასებით, იმ ზომების ერთობლიობა, რომლებსაც საოკუპაციო რეჟიმი მიმართავს, „პრობლემებს უქმნის“ არამხოლოდ ახალგორის ქართულ მოსახლეობას, არამედ ცხინვალის რეგიონში მცხოვრებ ყველა ადამიანს „განურჩევლად ეთნიკური კუთვნილებისა“.

„ამაზე ხმამაღალი მანიფესტი იმის, რომ რეჟიმი ადამიანების წინააღმდეგ მოქმედებს, როგორც ქართველების და ოსების ალბათ შეუძლებელია წარმოვიდგინოთ“, – განაცხადა ციხელაშვილმა.

აღნიშნულის ფონზე სახელმწიფო მინისტრი ახალგორის ე.წ. გადასასვლელი პუნქტის „დაუყოვნებლივი და წინაპირობების გარეშე“ გახსნის აუცილებლობაზე მიუთითებს და საოკუპაციო რეჟიმს სწორედ ამისკენ მოუწოდებს.

„ეს არის ჰუმანიტარული კრიზისის დასაძლევად აუცილებელი ნაბიჯი და მოვუწოდებ საოკუპაციო რეჟიმს და დე ფაქტო ხელისუფლებას, რომ ეს ნაბიჯი იქნას გადადგმული ადამიანის ინტერესებიდან გამომდინარე, როგორც ახალგორის ისე მთლიანად ცხინვალის რეგიონის მოსახლეობის“, – განაცხადა ციხელაშვილმა.

This post is also available in: English (ინგლისური) Русский (რუსული)

Related Articles

Back to top button