იენს სტოლტენბერგი ნატო-საქართველოს ურთიერთობების შესახებ საუბრობს

იენს სტოლტენბერგის პრესკონფერენცია, 15 მარტი, 2018. ფოტო: NATO

„ჩვენზე შთაბეჭდილება მოახდინა იმ რეფორმებმა, რომლის განხორციელებაც საქართველომ შეძლო, ასევე იმ ფაქტმა, რომ საქართველო მზადაა ჩაერთოს რუსეთთან დიალოგში იმის თაობაზე, თუ როგორ უნდა მოგვარდეს სამხრეთ ოსეთთან და აფხაზეთთან დაკავშირებული საკითხი“, – განაცხადა ნატოს გენერალურმა მდივანმა იენს სტოლტენბერგმა 15 მარტს ყოველწლიური ანგარიშის წარდგენის შემდეგ გამართულ პრესკონფერენციაზე.

ტელეკომპანია „რუსთავი 2“-ის კითხვის საპასუხოდ, იენს სტოლტენბერგმა აღნიშნა, რომ იგი იმედოვნებს, რომ ნატოს მომავალი სამიტი ბრიუსელში აღიარებს საქართველოს მიერ რეფორმების კუთხით მიღწეულ პროგრესსა და „იმ ძალიან მნიშვნელოვან წვლილს, რომელიც საქართველოს ნატოს მისიებსა და ოპერაციებში შეაქვს, განსაკუთრებით ავღანეთში“.

სტოლტენბერგმა გასულ კვირას პრეზიდენტ გიორგი მარგველაშვილთან გამართული შეხვედრაც ახსენა და ხაზი გაუსვა, რომ ალიანსი კვლავაც განაგრძობს საქართველოსთვის პოლიტიკური და პრაქტიკული დახმარების აღმოჩენას წვრთნისა და შესაძლებლობების ზრდისკენ მიმართული რეფორმების მეშვეობით.  

ნატოს გენერალური მდივანი პრესკონფერენციაზე მოგვიანებით კვლავ შეეხო საქართველოს საკითხს და აღნიშნა, რომ საქართველოში რუსეთის სამხედრო ძალების ყოფნა  მოსკოვის „უგუნური ქცევის“ და მის მიერ „მეზობლების წინააღმდეგ ძალის გამოყენების“ სურვილის ერთ-ერთი მაგალითია.