2.1%–იანი წლიური დეფლაცია თებერვალში
„საქსტატმა“ განაცხადა 4 მარტს, რომ 2013 წლის თებერვალში 2012 წლის თებერვალთან შედარებით ინფლაციის დონემ საქართველოში -2,1% შეადგინა მას შემდეგ, რაც იანვარში 1.6%–იანი დეფლაცია დაფიქსირდა.
ფასები 2013 წლის თებერვალში წინა თვესთან შედარებით 0.3%–ით შემცირდა.
თებერვალში 7%–ით შემცირდა ფასები საცხოვრებლის, წყლის, ელექტროენერგიის, აირის ჯგუფზე.
სურსათსა და უალკოჰოლო სასმელებზე თებერვალში ფასები 3.3%-ით, ხოლო ტრანსპორტზე 1.3%–ით შემცირდა წინა წლის ანალოგიურ პერიოდთან შედარებით.
ჯანდაცვის მომსახურებაზე ფასები 2.4%–ით, ხოლო ალკოჰოლურ სასმელებზე და თამბაქოზე 1.3%–ით გაიზარდა თებერვალში წინა წლის ანალოგიურ პერიოდთან შედარებით, იტყობინება „საქსტატი“.
საქართველოს ეროვნულმა ბანკმა თებერვალში მონეტარული პოლიტიკის განაკვეთი 50 საბაზისო პუნქტით, 4.75%–მდე შეამცირა. ეს ყველაზე დაბალი განაკვეთია მას შემდეგ, რაც 2008 წლის იანვრიდან ეროვნულმა ბანკმა ყოველთვიური რეფინანსირების განაკვეთების დაწესება დაიწყო.
This post is also available in: English (ინგლისური) Русский (რუსული)