ივანიშვილის თქმით, გიორგი მარგველაშვილი ვიცე-პრემიერი გახდება

პრემიერ-მინისტრმა ბიძინა ივანიშვილმა განაცხადა, რომ განათლების მინისტრი გიორგი მარგველაშვილი ვიცე-პრემიერის ვაკანტურ პოსტს დაიკავებს მთავრობაში.

„გიორგი, რა თქმა უნდა, იქნება ვიცე-პრემიერი და იქნება მოადგილე“, – განაცხადა ივანიშვილმა პრესკონფერენციაზე 5 თებერვალს. 

„მარგველაშვილი არის ინტელექტუალი, ჩემი მეგობარია, არ ვმალავ და ძალიან მიყვარს მასთან პოლემიკა“, – აღნიშნა მან.

პირველი ვიცე-პრემიერის პოსტი ვაკანტური მას შემდეგ გახდა, რაც პრემიერ-მინისტრმა ამ თანამდებობიდან 21 იანვარს მოხსნა ირაკლი ალასანია, რომელიც თავდაცვის მინისტრად აგრძელებს მუშაობას.  მეორე ვიცე-პრემიერის თანამდებობა ენერგეტიკის მინისტრს კახი კალაძეს უკავია.

ივანიშვილმა ასევე განაცხადა, რომ მთავრობაში, რომელსაც მან „ძალიან სწორად შერჩეული“ უწოდა, „არავითარი გადაადგილებები“ არ იგეგმება.

„მე ვფიქრობ, რომ ძალიან ეფექტური მთავრობაა“, – განაცხადა პრემიერ-მინისტრმა.

ამასთან მან პრესკონფერენციაზე, სადაც ახალი მთავრობის 100-დღიანი საქმიანობა შეაფასა, განაცხადა, რომ მის კაბინეტს ამ პერიოდში „სერიოზული შეცდომა“ არ დაუშვია.

„წვრილ-წვრილი შეცდომები, რა თქმა უნდა, არსებობს. მე მგონი ძალიან ფრთხილად ვიქცევით, ძალიან სწორად ვიქცევით“, – განაცხადა მან და დასძინა, რომ იქ სადაც პრობლემები არსებობს, „რეაქციებს ვაკეთებთ“.

This post is also available in: English (ინგლისური) Русский (რუსული)