აშშ–ის თავდაცვის მდივანმა ავღანეთში ქართველი სამხედროები მოინახულა

ავღანეთში ვიზიტის ფარგლებში აშშ–ის თავდაცვის მდივანმა ლეონ პანეტამ 14 მარტს ჰელმანდის პროვინციაში ქართველი სამხედროებიც მოინახულა, განაცხადა აშშ–ის თავდაცვის დეპარტამენტმა.

„თქვენ იმ საერთაშორისო პარტნიორობის მაგალითი ხართ, რომელიც ავღანეთში სტაბილურობისთვის იბრძვის“, – განუცხადა პანეტამ ქართველ სამხედროებს ბაზა „შუკვანზე“, რომელსაც თებერვალში პრეზიდენტი სააკაშვილიც სტუმრობდა.

„ვერც კი გეტყვით იმდენად ვაფასებთ თქვენს სამსახურს თქვენი ქვეყნისთვის და ავღანეთისთვის“, – განაცხადა აშშ–ის თავდაცვის მდივანმა.

წელს საქართველო ქვეითთა კიდევ ერთი ბატალიონის გაგზავნას გეგმავს ავღანეთში, რომლებიც დაემატებიან იმ 936 ქართველ ჯარისკაცს, ვინც უკვე მსახურობს ნატოს ეგიდით მიმდინარე ISAF-ის ოპერაციაში. დამატებითი ბატალიონის გაგზავნის შემდეგ – რაც 749 სამხედროს შეადგენს – საქართველო ნატოს ის არაწევრი სახელმწიფო იქნება, რომელსაც ყველაზე მეტი სამხედრო ეყოლება ავღანეთში.

ISAF-ის ოპერაციაში ჩართვის შემდეგ საქართველომ 15 სამხედრო დაკარგა ავღანეთში  – ყველა მათგანი ჰელმანდის პროვინციაში.

ქართველ სამხედროებთან სტუმრობისას ლეონ პანეტამ მათ ავღანეთში დაჭრილი ვიცე-პოლკოვნიკ ალექსანდრე ტუღუშის წერილი წაუკითხა, რომელმაც დეკემბერში ნაღმის აფეთქების შედეგად ორივე ფეხი დაკარგა და რომელიც ამჟამად აშშ-ში, ბეთესდაში მდებარე ვალტერ რიდის ეროვნულ სამხედრო სამედიცინო ცენტრში რეაბილიტაციის კურსს გადის. პრეზიდენტმა ობამამ ალექსანდრე ტუღუში 2 მარტს მოინახულა, როდესაც ის ვალტერ რიდის ეროვნულ სამხედრო სამედიცინო ცენტრს სტუმრობდა ერაყსა და ავღანეთში დაჭრილი სამხედროების მოსანახულებლად.