ბურჯანაძე რუსეთის საპრეზიდენტო არჩევნებზე კომენტარს აკეთებს
პარლამენტის თავმჯდომარემ ნინო ბურჯანაძემ განაცხადა, რომ დიმიტრი მედვედევის რუსეთის საპრეზიდენტო არჩევნებში გამარჯვება განსაკუთრებული მოულოდნელობა არ ყოფილა. მან ასევე გამოთქვა იმედი არჩევნების შემდეგ საქართველო-რუსეთის ურთიერთობების გაუმჯობესების თაობაზე.
”მე მინდა ვუსურვო მას [დიმიტრი მედვედევს], რომ ჰქონდეს სურვილი იმისა, რომ რუსეთ-საქართველოს ურთიერთობები გაუმჯობესდეს, ჰქონდეს სურვილი იმისა, რომ რუსეთი იყოს არა მარტო დიდი ქვეყანა, არამედ იყოს დემოკრატიული ქვეყანა, რომელთანაც მეგობრობა და მეზობლობა სასურველია”- განუცხადა ბურჯანაძემ ჟურნალისტებს 3 მარტს.
დიმიტრი მედვედევმა, პრეზიდენტ პუტინის ახლო მეგობარმა და როგორც მას უწოდებენ ”მემკვიდრემ”, 2 მარტის საპრეზიდენტო არჩევნების ხმათა უმრავლესობის დათვლის შედეგად 70%-ის მხარდაჭერა მოიპოვა. საპრეზიდენტო უფლებამოსილების მიღების შემდეგ მედვედევი პუტინს პრემიერ-მინისტრად დანიშნავს, როგორც ეს ადრე იყო გაცხადებული.