თავდასხმა ჟურნალისტზე

(თბილისი, 13 ოქტომბერი, 2003, სივილ ჯორჯია) – დამოუკიდებელი ტელეკომპანია “რუსთავი 2”-ის ჟურნალისტებს 12 ოქტომბერს ზუგდიდში თავს დაესხნენ, მაშინ როცა ისინი ახალგაზრდული მოძრაობა “კმარას” აქტივისტების მიერ მოწყობილი ანტისამთავრობო აქციის გადაღებას ცდილობდნენ.

“რუსთავი 2”-ის ჟურნალისტების განცხადებით, რამდენიმე შეიარაღებულმა პირმა, სახელისუფლებო ბლოკის “ახალი საქართველოსთვის” მხარდამჭერებმა, სასტიკად ცემეს მათი ოპერატორი.

11 ოქტომბერს პოლიცია ასევე დაესხა თავს “რუსთავი 2”-ის ჟურნალისტებს ფოთში. პოლიციამ მათ ვიდეოკამერა და ის ფირი წაართვა, რომელზეც ჩაწერილი იყო, თუ როგორ ცემდნენ პოლიციელები “კმარას” აქტივისტებს, რომლებიც ფოთში შევარდნაძის ვიზიტის დროს ჩავიდნენ ხელისუფლების საწინააღმდეგო აქციის ჩასატარებლად.

This post is also available in: English (ინგლისური) Русский (რუსული)