ღარიბაშვილი დავოსში მსოფლიო ეკონომიკურ ფორუმს დაესწრება
პრემიერ-მინისტრი ირაკლი ღარიბაშვილი შვეიცარიის საკურორტო ქალაქ დავოსში მსოფლიო ეკონომიკურ ფორუმზე დასასწრებად 20 იანვარს გაემგზავრება.
პრემიერ-მინისტრის ადმინისტრაციის ცნობით, ვიზიტის დასაწყისში ღარიბაშვილი მსოფლიო ეკონომიკური ფორუმის დამფუძნებლისა და აღმასრულებელი თავმჯდომარის კლაუს შვაბის კერძო მიღებასა და სადილს დაესწრება; ის ასევე მონაწილეობას მიიღებს მსოფლიო ლიდერების არაფორმალურ შეხვედრაში, სადაც მომავალი წლის ეკონომიკურ პრიორიტეტებს განიხილავენ.
ვიზიტის ფარგლებში დაგეგმილია საქართველოს პრემიერ-მინისტრის პირისპირ შეხვედრები „რამდენიმე ქვეყნის პირველ პირთან“ და „მსოფლიოში წამყვანი კომპანიების წარმომადგენლებთან“, იტყობინება მთავრობის ადმინისტრაცია.
ღარიბაშვილთან ერთად დავოსში ასევე გაემგზავრებიან მისი დელეგაციის წევრები: ეკონომიკის მინისტრი გიორგი კვირიკაშვილი, საგარეო საქმეთა მინისტრი თამარ ბერუჩაშვილი, საქართველოს თანაინვესტირების ფონდის აღმასრულებელი დირექტორი გიორგი ბაჩიაშვილი, ეროვნული საინვესტიციო სააგენტოს დირექტორი გიორგი პერტაია და „საქართველოს რკინიგზის“ გენერალური დირექტორი მამუკა ბახტაძე.