ფულადი გზავნილები რუსეთიდან თებერვალში 66.8%-ით შემცირდა
საქართველოს ეროვნული ბანკის მიერ 15 მარტს გამოქვეყნებული სტატისტიკური მონაცემებით, 2024 წლის თებერვალში რუსეთიდან ფულადი გზავნილები გასული წლის შესაბამის პერიოდთან შედარებით 66.8%-ით შემცირდა და 62.2 მლნ აშშ დოლარი შეადგინა. მიუხედავად შემცირებისა, რუსეთი კვლავ ლიდერობს იმ ქვეყნების ჩამონათვალში, საიდანაც საქართველოში ფული ირიცხება.
მთლიანობაში, მიმდინარე წლის თებერვალში ფულადი გზავნილები 2023 წლის თებერვალთან შედარებით 26.9%-ით შემცირდა და 272.3 მლნ აშშ დოლარი შეადგინა. ფულადი გზავნილების 38.79% ევროკავშირის ქვეყნებიდან მოდის, ხოლო 61.22% სხვა ქვეყნებიდან.
იმ ქვეყნების ხუთეულში, საიდანაც საქართველოში ფული ირიცხება, შედის: რუსეთი – 62.2 მლნ აშშ დოლარი (-66,8%); იტალია – 43.97 მლნ აშშ დოლარი (13.08%); აშშ – 41.21 მლნ აშშ დოლარი (35.33%); ისრაელი – 20.43 მლნ აშშ დოლარი (24.54%); საბერძნეთი – 18.99 მლნ აშშ დოლარი (9.28%).
ამავე პერიოდში საქართველოდან საზღვარგარეთ 29.0 მლნ აშშ დოლარი გაიგზავნა, რაც 5.1%-ით მეტია 2023 წლის თებერვლის ანალოგიურ მაჩვენებელზე (27.6 მლნ აშშ დოლარი).
ასევე წაიკითხეთ:
- 16/02/2024 – ეროვნული ბანკი რუსეთის მოქალაქეების დეპოზიტებზე ლიკვიდობის მოთხოვნას ამსუბუქებს
- 26/07/2023 – ქართულმა ბანკებმა „უნისტრიმის“ მეშვეობით ფულადი გზავნილები შეწყვიტეს
- 28/04/2023 – რუსული ბანკი სავალუტო ოპერაციებს ლარშიც განახორციელებს
This post is also available in: English (ინგლისური) Русский (რუსული)
