ყაზახეთის პრემიერმინისტრი საქართველოს სტუმრობს
ყაზახეთის რესპუბლიკის პრემიერ-მინისტრი ალიხან სმაილოვი 22 ივნისს საქართველოში ოფიციალური ვიზიტით ჩამოვიდა. პრემიერმინისტრმა ირაკლი ღარიბაშვილმა ალიხან სმაილოვსა და ყაზახეთის რესპუბლიკის დელეგაციას ოფიციალურ სადილზე უმასპინძლა. ვიზიტის ფარგლებში, დღეს გაიმართა საქართველოსა და ყაზახეთის რესპუბლიკის პრემიერმინისტრების შეხვედრა პირისპირ და გაფართოებულ ფორმატებში, რის შემდეგაც მედიისთვის ერთობლივი განცხადებები გაკეთდა.
ვიზიტის ფარგლებში ასევე ხელი მოეწერა საქართველოს ეკონომიკისა და მდგრადი განვითარების სამინისტროსა და ყაზახეთის რესპუბლიკის ენერგეტიკის სამინისტროს შორის ურთიერთგაგების მემორანდუმს და ქართულ და ყაზახურ კომპანიებს შორის შეთანხმებას.
პრემიერმინისტრების ერთობლივი განცხადებები
პრემიერმინისტრმა ირაკლი ღარიბაშვილმა განაცხადა, რომ პირისპირ შეხვედრის დროს, მხარეებმა დაგეგმილი პროექტები განიხილეს, რომლებიც ორ ქვეყანას შორის სტრატეგიულ თანამშრომლობას კიდევ უფრო გააძლიერებს.
„ჩვენ გვქონდა ძალიან შინაარსიანი განხილვები. მიმოვიხილეთ მიმდინარე საკითხები, რომლებიც უკავშირდება ყაზახეთს და საქართველოს. ჩვენ ასევე აღვნიშნეთ, რომ ის ტენდენცია, რომელიც დაფიქსირდა ბოლო პერიოდში – მე ვგულისხმობ, ექსპორტის ზრდას და ზოგადად, სავაჭრო ბრუნვის ზრდას. მე ასევე მინდა სიხარულით აღვნიშნო, რომ ტურისტების რაოდენობა ყაზახეთიდან საქართველოში ყოველ წელს იზრდება. ჩვენ მოხარული ვართ ვიხილოთ მეტი ყაზახი ტურისტი და ინვესტორი საქართველოში“, – განაცხადა საქართველოს პრემიერმინისტრმა.
შეხვედრაზე პრემიერმინისტრებმა ასევე განიხილეს სხვადასხვა დაგეგმილი პროექტები, რომლებიც ორ ქვეყანას შორის სტრატეგიული თანამშრომლობის გაღრმავებას ისახავს მიზნად. მათ ხაზი გაუსვეს „შუა დერეფნის“ ინიციატივის მნიშვნელობას, რომელიც მოიცავს აზერბაიჯანს, საქართველოს და ყაზახეთს და რომლის მიზანია გაზარდოს ამ მარშრუტის მიმზიდველობა ტვირთების ტრანსპორტირებისთვის. დერეფანი ცენტრალურ აზიას, ჩინეთს და აზიის სხვა ქვეყნებს ევროპას დაუკავშირებს. ღარიბაშვილის თქმით, შემუშავებულია ხუთწლიანი საგზაო რუკა, რომელშიც ასახულია თითოეული ქვეყნის პასუხისმგებლობა 2027 წლამდე. ამასთან, მნიშვნელოვანი ინვესტიციები იდება რკინიგზის მოდერნიზაციისა და გამტარუნარიანობის გაზრდის მიზნით, ახალი პორტის, კონკრეტულად კი ანაკლიის ღრმაწყლოვანი პორტის მშენებლობის მიზნით, აღნიშნა ღარიბაშვილმა.
ღარიბაშვილმა ხაზი გაუსვა ვაჭრობის მოცულობის მნიშვნელოვან ზრდას და აღნიშნა, რომ გასული წლის განმავლობაში 136%-იანი ზრდა დაფიქსირდა, რასაც მან „პოზიტიური მოვლენა“ უწოდა. მისივე თქმით, ზრდის ტენდენცია მიმდინარე წელსაც გაგრძელდა და იანვრიდან აპრილამდე სავაჭრო ბრუნვამ 188 მილიონი აშშ დოლარი შეადგინა, რაც წინა წლის ანალოგიურ პერიოდთან შედარებით 283%-იანი ზრდაა. საქართველოს პრემიერმინისტრმა ხაზი გაუსვა ქვეყნებს შორის არსებული თანამშრომლობის მნიშვნელობას, განსაკუთრებით კულტურის, განათლების, მეცნიერებისა და სპორტის სფეროებში. გარდა ამისა, მან გამოთქვა მზადყოფნა გააგრძელოს თანამშრომლობა ყაზახეთთან, კერძოდ, რეფორმებთან დაკავშირებით ორმხრივი გამოცდილების გაცვლის კუთხით.
თავის მხრივ, ალიხან სმაილოვმა განაცხადა, რომ საქართველოს მნიშვნელოვან პოლიტიკურ და ეკონომიკურ როლს თამაშობს როგორც ყაზახეთის პარტნიორი სამხრეთ კავკასიის რეგიონში. მან ხაზი გაუსვა მეგობრობასა და ნდობაზე დაფუძნებული სისტემური ურთიერთობების განვითარებას და აღნიშნა, რომ ორ ქვეყანას შორის თანამშრომლობა ფართოდ ვრცელდება საერთაშორისო ორგანიზაციების ფარგლებში, რაც მათ მჭიდრო კავშირებს ასახავს.
ყაზახეთის პრემიერმინისტრმა განაცხადა, რომ შეხვედრაზე საუბარი შეეხო ორმხრივ თანამშრომლობას და ახალი და პერსპექტიული პროექტების შესწავლას. სმაილოვმა მზარდ სავაჭრო ბრუნვასა და პროდუქციის ასორტიმენტის გაფართოების პოტენციალზე გაამახვილა ყურადღება. გასულ წელს ვაჭრობის მოცულობა შვიდჯერ გაიზარდა და 600 მილიონ აშშ დოლარს გადააჭარბა, რაც დადებით ტენდენციაზე მიუთითებს. ზრდის შემდგომი ხელშეწყობის მიზნით, მხარეები შეთანხმდნენ, რომ მაქსიმალურად გამოიყენონ სამთავრობათაშორისო კომისიის ფორმატი.
სმაილოვმა მზადყოფნა გამოთქვა, რომ საქართველოსთან თანამშრომლობა განავითაროს, კერძოდ, კასპიისა და შავი ზღვის აუზების სატრანსპორტო მარშრუტებად გამოყენების კუთხით. მან ხაზი გაუსვა ორივე ქვეყნის საპორტო ინფრასტრუქტურის ტვირთის ტრანსპორტირებისთვის გამოყენების მნიშვნელობას. შეხვედრაზე ხაზი გაესვა საქართველოსა და ყაზახეთის პოტენციალს გადამწყვეტი როლის შეასრულონ ევროპასა და აზიას შორის ტრანსპორტის ხელშეწყობაში.
სმაილოვმა ასევე ხაზი გაუსვა 1 ივნისს ორი ქვეყნის დედაქალაქებს შორის პირდაპირი ფრენების დაწყებას და მოუწოდა ქართულ ავიაკომპანიებს რეგულარული ფრენები განახორციელონ ყაზახეთში. მისივე თქმით, მსგავსი ინიციატივები დადებითად აისახება ბიზნეს ურთიერთობებზე, ადამიანთა შორის კონტაქტებსა და ტურიზმის სექტორზე.
ასევე წაიკითხეთ:
- 27/07/2022 – ირაკლი ღარიბაშვილი ყაზახეთს სტუმრობს
This post is also available in: English (ინგლისური) Русский (რუსული)
