2023 წლის იანვარ-ივნისში საქართველოს 2.86 მლნ საერთაშორისო მოგზაური ესტუმრა

საქართველოს იანვარ-ივნისში 2.86 მილიონი საერთაშორისო მოგზაური ეწვია, ამის შეხახებ ინფორმაცია ტურიზმის ეროვნულმა ადმინისტრაციამ 17 ივლისს გამოაქვეყნა. მოცემული სტატისტიკური მონაცემების მიხედვით, ვიზიტორთა ეს რაოდენობა პანდემიამდე პერიოდის მონაცემების 74%-იანი აღდგენაა. ამავდროულად, 2022 წლის ანალოგიურ პერიოდთან შედარებით ზრდამ 75.9%-ს მიაღწია.

კერძოდ მეორე კვარტალში საერთაშორისო მოგზაურების რაოდენობა 1.65 მილიონს წარმოადგენდა. ეს პანდემიამდე არსებული მონაცემების 73.6%-იანი აღდგენაა და 2022 წელთან შედარებით 57.4%-იანი ზრდა.

რაც შეეხება საერთაშორისო ტურისტულ ვიზიტებს, 2023 წლის პირველ და მეორე კვარტალში ქვეყანაში 1.93 მილიონი ვიზიტი შედგა, რაც 2019 წლის მონაცემების 90.8%-ით აღდგენაა, 2022 წელთან შედარებით კი ზრდა 59.6%-ს შეადგენს.

ამასთან, აპრილი-ივნისის პერიოდში საქართველოში 1.09 მილიონი საერთაშორისო ტურისტული ვიზიტი შედგა, რაც წარმოადგენს 2019 წლის მონაცემის 87.2% აღდგენას და წინა წელთან შედარებით 44.8%-იან ზრდას.

ადმინისტრაციის ცნობით, „საერთაშორისო მოგზაურებისა და საერთაშორისო ტურისტული ვიზიტების რაოდენობა გამოითვლება მსოფლიო ტურიზმის ორგანიზაციის რეკომენდაციით შემუშავებული მეთოდოლოგიის მიხედვით და მოიცავს უკვე განხორციელებულ და დასრულებულ ვიზიტებს“.

This post is also available in: English (ინგლისური) Русский (რუსული)