ნატოს გაერთიანებული ძალების წვრთნების ცენტრის მეთაურის მოადგილე საქართველოს სტუმრობს
ნატოს დელეგაცია გაერთიანებული ძალების წვრთნების ცენტრის მეთაურის მოადგილის, ბრიგადის გენერალ იოჟეფ სპიშიაკის ხელმძღვანელობით საქართველოში ჩამოვიდა, სადაც 2022 წლის მარტში დაგეგმილი ნატო-საქართველოს ერთობლივი წვრთნების მზადება მიმდინარეობს.
ქართულმა მხარემ, რომელიც სწავლებას დაგეგმვიდან აღსრულების ფაზის ჩათვლით უხელმძღვანელებს, დელეგაციას ნატო-საქართველოს წვრთნისა და შეფასების ერთობლივ ცენტრში (JTEC) უმასპინძლა, სადაც სამდღიანი შემაჯამებელი კონფერენცია გაიმართა.
ბრიგადის გენერალმა იოჟეფ სპიშიაკმა სამუშაო შეხვედრა გამართა საქართველოს თავდაცვის ძალების მეთაურის მოადგილეებთან, გენერალ-მაიორ ზაზა ჩხაიძესთან და ბრიგადის გენერალ ირაკლი ჭიჭინაძესთან.
ბრიგადის გენერალმა ირაკლი ჭიჭინაძემ განაცხადა, რომ მხარეებმა მოახლოებული წვრთნების დეტალებზე, ასევე სამხედრო წვრთნებისა და განათლების მიმართულებით ნატო-საქართველოს პარტნიორობის გაღრმავებაზე ისაუბრეს.
თავის მხრივ, ბრიგადის გენერალმა სპიშიაკმა იმედი გამოთქვა, რომ წვრთნები წარმატებული იქნება. „გაერთიანებული ძალების წვრთნების ცენტრი მზადაა მხარი დაუჭიროს პარტნიორებს, ნატო-საქართველოს წვრთნისა და შეფასების ერთობლივ ცენტრს 2022 წლის ნატო-საქართველოს წვრთნების აღსრულების ფაზაზე“, – აღნიშნა მან.
ბრიგადის გენერალი სპიშიაკი ვაზიანის საბრძოლო მომზადების ცენტრსაც ესტუმრა და ქართველი სამხედროების საველე მომზადებას დაესწრო.
„ნატო-საქართველოს სწავლება 2022“ ნატო-საქართველოს წვრთნებისა და შეფასების ერთობლივ ცენტრში (JTEC) ჩატარდება. სწავლება ნატო-საქართველოს არსებითი პაკეტის ფარგლებში (SNGP) ხორციელდება და ჩრდილო-ატლანტიკურ ალიანსთან საქართველოს თავსებადობის ამაღლებას შეუწყობს ხელს. სწავლებაში მონაწილეობას ოცზე მეტი ნატოს წევრი და პარტნიორი ქვეყნის სამხედრო მოსამსახურეები მიიღებენ.
ბოლო ნატო-საქართველოს ერთობლივი სწავლება 2019 წლის მარტში, პირველი კი – 2016 წელს გაიმართა.
ასევე წაიკითხეთ:
- წერილობითი წინადადებები რუსეთს: ნატო საქართველოს კარს არ უხურავს
- მრავალეროვნული სამხედრო სწავლება „Agile Spirit 2021“ დასრულდა
- თბილისის მახლობლად ნატო-საქართველოს წვრთნები ჩატარდება
This post is also available in: English (ინგლისური) Русский (რუსული)
