ვაშაძე აზერბაიჯანთან საზღვრის დელიმიტაციის შესახებ საუბრობს
აზერბაიჯანთან საზღვრის დელიმიტაციის თაობაზე შეთანხმება არ იქნება მიღწეული საქართველოს ეროვნული ინტერესების დარღვევის ხარჯზე, განაცხადა საგარეო საქმეთა მინისტრმა გრიგოლ ვაშაძემ.
“არავითარი მოლაპარაკება არ მოხდება საქართველოს ნაციონალური ინტერესების დარღვევის ხარჯზე. [ტერიტორიის] ერთი კვადრატული სანტიმეტრი არავის არ გადაეცემა შესაბამისი კომპენსაციის გარეშე,“ – განაცხადა მან 27 დეკემბერს წლის შემაჯამებელ შეხვედრაზე.
მისი თქმით, საქართველო–აზერბაიჯანის საზღვრის დელიმიტაციის საკითხზე ორმხრივი რეგულარული მოლაპარაკებები კვლავაც გაგრძელდება, ვინაიდან ვერ მოხერხდა შეთანხმება "საზღვრის რამდენიმე მონაკვეთზე“.
ორ ქვეყანას შორის საზღვრის 35% ჯერ კიდევ შესათანხმებელია, მათ შორის სადავო მონაკვეთია ის ტერიტორია, სადაც საქართველოს კულტურული და რელიგიური მემკვიდრეობის ძეგლი – "დავით გარეჯის” სამონასტრო კომპლექსი მდებარეობს.
