რუსეთის გენშტაბი უარყოფს საქართველოში შემოჭრის გეგმებს
რუსეთის შეიარაღებული ძალების გენშტაბი არ განიხილავს საქართველოში შეჭრის გეგმებს, განაცხადა გენშტაბის უფროსმა ნიკოლაი მაკაროვმა.
”ის ინფორმაცია, თითქოს რუსეთი 2009 წლის გაზაფხულზე აპირებს საქართველოზე თავდასხმას, არაფერს არ ეფუძნება,”- იუწყება 10 დეკემბერს ”ინტერფაქსი” მაკაროვის სიტყვებზე დაყრდნობით.
იმავდროულად, რუსმა გენერალმა თბილისს დააკისრა სრული პასუხისმგებლობა აგვისტოში საომარი მოქმედებების დაწყებაში.
”მე, როგორც გენშტაბის მეთაური ოფიციალურად ვაცხადებ, რომ 8 აგვისტოს 14 საათამდე არცერთი ტანკი არ შესულა სამხრეთ ოსეთის ტერიტორიაზე,”- განაცხადა მან მოსკოვში უცხოელ სამხედრო ატაშეებთან შეხვედრაზე.
საქართველოს პრეზიდენტმა მიხეილ სააკაშვილმა 28 ნოემბერს აგვისტოს მოვლენების შემსწავლელ დროებით კომისიას განუცხადა, რომ მან სამხედრო მოქმედებების დაწყებაზე გადაწყვეტილება 7 აგვისტოს მას შემდეგ მიიღო, რაც რუსულმა ძალებმა დაიწყეს როკის გვირაბის მეშვეობით საქართველოს საზღვრის გადმოკვეთა.