რუსეთის ფედერაციას ოფიციალურად ეცნობა დიპურთიერთობების გაწყვეტის შესახებ
საქართველოს საგარეო საქმეთა სამინისტრომ ოფიციალურად აცნობა რუსეთს დიპლომატიური ურთიერთობების გაწყვეტის და იმავდროულად, საკონსულო ურთიერთობების შენარჩუნების თაობაზე.
საქართველოს საგარეო უწყების ოფიციალურმა წარმომადგენელმა 2 სექტემბერს შესაბამისი ორი ნოტა გადასცა საქართველოში რუსეთის ფედერაციის საგანგებო და სრულუფლებიან დესპანს ალექსანდრე სმაგას.
”ეს ქართული მხარის კიდევ ერთი შეცდომაა, რაც ხელს არ უწყობს პრობლემების მოგვარებას,”- განუცხადა სმაგამ ჟურნალისტებს საგარეო საქმეთა სამინისტროდან გამოსვლისას, ”[რუსეთის] საელჩო ფორმალურად წყვეტს ხვალიდან ფუნქციონირებას”.
”პირველ ნოტაში აღნიშნულია, რომ საქართველოს წინააღმდეგ რუსეთის ფედერაციის მტრულ ქმედებებთან დაკავშირებით, რაც გამოიხატა საქართველოს წინააღმდეგ სამხედრო აგრესიაში, ქვეყნის ნაწილის ოკუპაციაში, საქართველოს ტერიტორიის საერთაშორისოდ აღიარებულ ნაწილებში – აფხაზეთსა და ცხინვალის რეგიონში ეთნიკურ წმენდასა და მათი ე.წ. დამოუკიდებლობის უკანონო აღიარებაში, გამომდინარე საქართველოს პარლამენტის 2008 წლის 28 აგვისტოს დადგენილებიდან, საქართველო წყვეტს 1992 წლის 2 ივლისის "საქართველოს რესპუბლიკასა და რუსეთის ფედერაციას შორის დიპლომატიური ურთიერთობის დამყარების შესახებ” ოქმის მოქმედებას,”- ნათქვამია საქართველოს საგარეო უწყების ინფორმაციაში.
მეორე ნოტაში, ქართული მხარე აღნიშნავს, რომ მოსკოვში არსებული საკონსულო სამსახური – კონსული, ორი ვიცე-კონსული, ტექნიკური პერსონალი – განაგრძობს თავის საქმიანობას.