მედვედევი: არ შეიცვლება გადაწყვეტილება აფხაზეთისა და სამხრეთ ოსეთის აღიარების თაობაზე
რუსეთის პრეზიდენტმა დიმიტრი მედვედევმა განაცხადა, რომ რუსეთი არ შეცვლის პოზიციას აფხაზეთის და სამხრეთ ოსეთის დამოუკიდებლობის აღიარებასთან დაკავშირებით.
”სამართლებრივი თვალსაზრისით, ახალი სახელმწიფოები წარმოიქმნა. მათი აღიარების პროცესი შეიძლება გაგრძელდეს საკმაოდ ხანგრძლივი ვადით,”- განუცხადა მედვედევმა 31 აგვისტოს რუსულ ტელეკომპანიებს ინტერვიუში, რომელიც კრემლის ვებ-გვერდზე გამოქვეყნდა, ”ამის გამო ჩვენი პოზიცია არანაირად არ შეიცვლება. ჩვენ გადაწყვეტილება მივიღეთ და აღარ გადაისინჯება”.
მედვედევის განცხადებით, ამჟამად მზადდება რუსეთ-აფხაზეთის და რუსეთ სამხრეთ-ოსეთის სამოკავშირეო ხელშეკრულებები.
”ამ საერთაშორისო შეთანხმებებში დაფიქსირდება ჩვენი ყველა ვალდებულება მხარდაჭერისა და დახმარების აღმოჩენის კუთხით: ეკონომიკურ, სოციალურ, ჰუმანიტარულ, ამ სიტყვის ფართო გაგებით და ბოლოს, სამხედრო სფეროებში,”- განაცხადა მედვედევმა, ”ეს იქნება ნორმალური, სრულყოფილი საერთაშორისო-სამართლებრივი, სამოკავშირეო ურთიერთობები”.
მან ასევე დაასახელა ის ხუთი ძირითადი პრინციპი, რომლითაც რუსეთის თავის საგარეო პოლიტიკაში იხელმძღვანელებს, მათ შორის იმ პრინციპებით, რომ მსოფლიო უნდა იყოს მრავალპოლარული, რადგან ერთპოლარულობა მიუღებელია; რუსეთი არ აპირებს იზოლირებას; პასუხს მიიღებს ყველა ის, ვინც აგრესიულად მოექცევა რუსეთის მოქალაქეებს; რუსეთი აქტიურად იმუშავებს მეზობელ რეგიონებთან, სადაც ”პრივილეგირებული ინტერესები” გააჩნია.