ოპოზიცია 12 უბანზე არჩევნების შედეგების გაბათილებას ითხოვს
ცხრა პარტიის ოპოზიციურმა ბლოკმა განაცხადა, რომ ”მძიმე დარღვევები” დაფიქსირდა 12 საარჩევნო უბანზე, მათ შორის საგარეჯოში, ხონში, ხაშურში და სიღნაღში და მოითხოვა ამ უბნებზე არჩევნების შედეგების გაბათილება.
”ჩვენს წარმომადგენლებს ამ უბნებზე [საგარეჯოს ოლქის 45-ე, 46-ე, 35-ე, 36-ე საარჩევნო უბნებზე] ფიზიკური შეურაცხყოფა მიაყენეს,” – განაცხადა ახალი მემარჯვენეების ლიდერმა დავით გამყრელიძემ დილის 10 საათზე გამართულ პრესკონფერენციაზე. მან ასევე აღნიშნა, რომ ამ უბნებზე ზედმეტი ბიულეტენების ჩაყრა ხდება.
ცენტრალური საარჩევნო კომისიის (ცსკ) წარმომადგენელმა ზურაბ კაჭკაჭიშვილმა დილის 9 საათზე გამართულ პრესკონფერენციაზე განაცხადა, რომ ერთადერთი ინციდენტი დაფიქსრიდა საგარეჯოს რაიონის 37-ე საარჩევნო უბანზე. მისი თქმით, საარჩევნო კომისიის წევრებს შორის შეკამათება მოხდა, ”თუმცა ინციდენტი უკვე ამოწურულია და არჩევნები ამჟამად ყველგან ნორმალურ ვითარებაში მიმდინარეობს”.