გაერთიანებული ოპოზიცია გაყალბების წინააღმდეგ გამაფრთხილებელ აქციას მართავს
ცხრა ოპოზიციური პარტიის კოალიციის ორგანიზებით დღეს სპორტის სასახლესთან საპარლამენტო არჩევნების გაყალბების წინააღმდეგ გამაფრთხილებელი აქცია გაიმართა, მოგვიანებით აქციის მონაწილეებმა ცენტრალური საარჩევნო კომისიის შენობასთან გადაინაცვლეს.
”სანამ [ცესკოს თავმჯდომარე ლევან] თარხნიშვილი არ გამოაცხადებს შედეგებს ჩვენი შიშის ქვეშ იყოს, თუ გამოაცხადებს იმ შედეგებს, რომელიც იქნება სიყალბე, მივალთ, მე პირადად მივალ, წავავლებ იმ ჰალსტუხში ხელს და გამოვიყვან ხალხში, თქვენს სამსჯავროზე,”- განუცხადა აქციის მონაწილეებს გაერთიანებული ოპოზიციის ლიდერმა ლევან გაჩეჩილაძემ.
”გაიგოს ხელისუფლებამ, სიმბოლური აქციაა, მაგრამ ძალიან მტკივნეული მათთვის, გამზადებული გვაქვს ორი დიდი ფიცარი, რომ ავჭედოთ ცესკო დღეს,”- განაცხადა მან.
ამის შემდეგ მოეწყო დემონსტრაცია ცესკოს შენობისკენ, სადაც ისმის საპროტესტო შეძახილები საარჩევნო ადმინისტრაციის ხელმძღვანელობის მისამართით. შენობას პოლიციის გაძლიერებული შემადგენლობა იცავს. უკვე ჰქონდა შეხლა-შემოხლის ინციდენტს ადგილი პოლიციელებსა და საპროტესტო აქციის მონაწილეებს შორის.
”ჩვენი შეკრებით გვინდა გავაფრთხილოთ თარხნიშვილი, ის რუხი კარდინალი [ცესკოს მდივანი გიზო] მჭედლიძე და გავაფრთხილოთ სააკაშვილი და მისი ხელისუფლება, რომ ჩვენ სიყალბეს აღარ შევეგუებით, იმ სიყალბეს, რომელსაც 4 წელიწადი თავს გვახვევდნენ,”- განაცხადა ახალი მემარჯვენეების ლიდერმა დავით გამყრელიძე.