საპატრიარქოში ხელისუფლების და ოპოზიციის შეხვედრა შედგა
გაერთიანებული ოპოზიციის ლიდერები დავით უსუფაშვილი, კახა კუკავა და სალომე ზურაბიშვილი – რესპუბლიკელების, კონსერვატორების და საქართველოს გზის ლიდერები დღეს საპატრიარქოში პარლამენტის თავმჯდომარეს ნინო ბურჯანაძეს და ვიცე-სპიკერს მიხეილ მაჭავარიანს შეხვდნენ.
შეხვედრას ასევე ესწრებოდნენ ”ახალი მემარჯვენეების” და ”მრეწველების” ლიდერები დავით გამყრელიძე და ზურაბ ტყემალაძე.
შეხვედრაზე გადაწყდა, რომ დიალოგი დღეს საღამოს პარლამენტში გაგრძელდება.
9 ნოემბერს ნინო ბურჯანაძემ განაცხადა, რომ მზად არის ”ოპოზიციის ჯანსაღ ნაწილთან” გამართოს მოლაპარაკებები.
”არიან ადამიანები და პოლიტიკური ძალები, რომლებთან მე და ჩემი კოლეგები დიალოგს არ გავმართავთ – ეს არიან ის ადამიანები, რომლებიც მხილებულნი და ეჭვმიტანილნი არიან კონკრეტულ სპეცსამსახურებთან თანამშრომლობაში. მათთან სალაპარაკო არაფერი გვაქვს,”- აღნიშნა მან.