ახალი ამბები
ვმო-ზე რუსულ-ქართული მოლაპარაკებები ჟენევაში იგეგმება
მოსკოვი და თბილისი რუსეთის ვაჭრობის მსოფლიო ორგანიზაციაში (ვმო) გაწევრიანებაზე მოლაპარაკებათა მორიგ რაუნდს 19 ოქტომბერს ჟენევაში გამართავენ, იუწყება ”ინტერფაქსი” რუსეთის დელეგაციის ხელმძღვანელის მაქსიმ მედვედკოვის სიტყვებზე დაყრდნობით.
ვმო-ში გაწევრიანების მხარდაჭერის სანაცვლოდ ქართული მხარის მოთხოვნაა რუსეთი დათანხმდეს რუსეთ-საქართველოს საზღვარზე – აფხაზეთსა და სამხრეთ ოსეთში – მოქმედი ორი არალეგალური საბაჟო-გამშვები პუნქტის ლეგალიზაციას და გამართულ ფუნქციონირებას.
”ჩვენ მიგვაჩნია, რომ ვმო-ს ამ საკითხებთან არავითარი კავშირი არ აქვს,”- აცხადებს მედვედკოვი.
მისი თქმით, ჯერ-ჯერობით გაურკვეველია რამდენად შედეგიანი იქნება ჟენევის შეხვედრა, ”თუმცა ქართული მხარე ბოლო დროს ამ მოლაპარაკებებში სიტყვიერი დიალოგიდან საგნობრივ განხილვაზე გადავიდა”.