ოპოზიციური პარტიები ინტელიგენციის წარმომადგენლებს შეხვდნენ
ოპოზიციის წარმომადგენლებმა, რომლებიც თავდაცვის ყოფილი მინისტრის ირაკლი ოქრუაშვილის დაპატიმრების შემდეგ საყოველთაო სახალხო მოძრაობას ჩაუდგნენ სათავეში, დღეს ჭადრაკის სასახლეში ინტელიგენციასთან გამართეს შეხვედრა და სამომავლო გეგმებზე ისაუბრეს.
ოპოზიციის ლიდერებმა შეკრებილ საზოგადოებას 2 ნოემბერს პარლამენტის შენობის წინ ფართომასშტაბიან საპროტესტო აქციაში მონაწილეობისაკენ მოუწოდეს.
დღევანდელი შეხვედრის მონაწილეებმა ხელი მოაწერეს ასევე დოკუმენტს სახელწოდებით – ”არ მეშინია”.
”ჩვენ შევიკრიბეთ აქ იმისათვის, რომ საქართველოს ხელისუფლებას დავანახოთ, რომ ჩვენ არ გვეშინია, ჩვენ ვართ ერთად, ყველაფერი თავისით მოვა”, – განუცხადა სახალხო მოძრაობის ერთ-ერთმა ლიდერმა, დეპუტატმა ლევან გაჩეჩილაძემ ინტელიგენციის წარმომადგენლებს.
ინტელიგენციასთან შეხვედრა ნაწილი იყო იმ კამპანიისა, რომელსაც ათი ოპოზიციური ჯგუფი ერთი თვის განმავლობაში გეგმავს, მათ შორის რეგიონებში. სახალხო მოძრაობის სამი მოთხოვნაა: 2008 წლის აპრილში საპარლამენტო არჩევნების გამართვა, საქართველოში საპარლამენტო რესპუბლიკის მმართველობის მოდელის შემოღება და ირაკლი ოქრუაშვილის გათავისუფლება.