რუსულ ბაზებთან დაკავშირებული დადგენილების პროექტის განხილვა შესაძლოა დღის წესრიგიდან მოიხსნას

დღეს პარლამენტის პლენარულ სხდომაზე პარლამენტის თავმჯდომარემ ნინო ბურჯანაძემ განაცხადა, რომ რუსული ბაზების კანონგარეშედ გამოცხადებასთან დაკავშირებული დადგენილების პროექტის განხილვა, რომელიც 9 მარტს იგეგმებოდა, მოხდება “არა პლენარული სხდომის, არამედ კომიტეტების დონეზე“. პროექტის ინიციატორი თავდაცვისა და უშიშროების და საგარეო საქმეთა საკითხთა კომიტეტები დღეს ამ საკითხთან დაკავშირებით საკომიტეტო მოსმენას გეგმავენ .

ბურჯანაძის განცხადებით, მოსკოვთან მიღწეული შეთანხმების მიხედვით რუსულმა მხარემ თბილისს 1 მაისამდე უნდა წარუდგინოს ბაზების გაყვანასთან დაკავშირებით კონკრეტული წინადადებები. “თუ რუსეთის მხარე არ შეასრულებს პირობას, მაშინ ჩვენ ამ დადგენილების პროექტს დავუბრუნდებით და მოვითხოვთ ბაზების უპირობოდ გაყვანას“, განაცხადა 9 მარტს პარლამენტის თავმჯდომარემ.

18 თებერვალს რუსეთის საგარეო საქმეთა მინისტრის სერგეი ლავროვის თბილისში ვიზიტის დროს მიღწეულ იქნა შეთანხმება, რომ რუსეთ–საქართველოს პრობლემურ საკითხებზე, მათ შორის რუსულ ბაზების გაყვანის ვადებთან დაკავშირებით, კონკრეტული წინადადებები 1 მაისამდე მომზადდება.

ბურჯანაძემ ასევე დასძინა, რომ მისთვის “მოულოდნელობა“ იყო, როცა პარლამენტის დღის წესრიგში აღნიშნული დადგენილება აღმოაჩინა და ხაზი გაუსვა, რომ ეს საკითხი “შეთანხმებული არ იყო [პარლამენტის] ხელმძღვანელობასთან“.

რუსული სამხედრო ბაზების წინააღმდეგ დადგენილების პროექტის განხილვის თაობაზე გადაწყვეტილება 7 მარტს, პარლამენტის ბიუროს სხდომამ მიიღო, რომელსაც ნინო ბურჯანაძე გერმანიაში ვიზიტის გამო არ ესწრებოდა.