საქართველომ და ნატომ სატრანზიტო შეთანხმებას მოაწერეს ხელი
საქართველოს საგარეო საქმეთა მინისტრმა სალომე ზურაბიშვილმა და ნატოს გენერალურმა მდივანმა იააპ დე ჰოოპ სხეფერმა 2 მარტს ბრიუსელში ხელი მოაწერეს შეთანხმებას, რომელიც ითვალისწინებს საქართველოს საჰაერო სივრცის, ასევე საგზაო და სარკინიგზო ინფრასტრუქტურის გამოყენებას ნატოს სატრანზიტო მიზნებისთვის.
ალიანსის მიერ 2 მარტს გამოქვეყნებულ პრეს-რელიზში ნათქვამია, რომ შეთანხმება მნიშვნელოვნად დაეხმარება ნატოს, კერძოდ საერთაშორისო უსაფრთხოების უზრუნველყოფის ძალების (ISAF) მისიის საქმიანობას ავღანეთში. იგი საშუალებას მისცემს ნატოს და ISAF-ის წევრ ქვეყნებს საქართველოს გავლით მიაწოდონ საჭირო მარაგი და აღჭურვილობა თავიანთ ძალებს ავღანეთში.
„ამ შეთანხმების გაფორმებით საქართველომ მნიშვნელოვანი წვლილი შეიტანა ISAF-ის მისიაში. იგი განსაკუთრებით მნიშვნელოვანია ნატოს მიერ ცოტა ხნის წინ მიღებული გადაწყვეტილების ფონზე, რომელიც გულისხმობს ნატოს სამშვიდობო მისიის მოქმედების ზონის გაფართოებას ავღანეთის დასავლეთის მიმართულებით“, ნათქვამია პრეს-რელიზში.
ISAF-ის ჯარები ავღანეთის ახალ ადმინისტრაციას უსაფრთხოების უზრუნველყოფაში ეხმარება. ISAF-ის მისია 2003 წლის აგვისტოდან ნატოს სარდლობის დაქვემდებარებაში იმყოფება.