რუსეთის ეკონომიკის მინისტრი მიესალმება ბენდუქიძის დანიშვნას
რუსეთის ეკონომიკური განვითარებისა და ვაჭრობის მინისტრმა გერმან გრეფმა დადებითად შეაფასა საქართველოს ეკონომიკის მინისტრად რუსეთში მოღვაწე გავლენიანი ქართველი ბიზნესმენის კახა ბენდუქიძის დანიშვნა .
„იგი [კახა ბენდუქიძე] ძალიან გამოცდილი ადამიანია. მე ვფიქრობ, მისი დანიშვნა საკმაოდ პოზიტიური ნაბიჯია“, განუცხადა გერმან გრეფმა რუსეთის საინფორმაციო სააგენტო „რია ნოვოსტის“.
გერმან გრეფმა, რომელიც ახლახანს თბილისში გამართულ რუსეთ-საქართველოს ეკონომიკურ ფორუმს დაესწრო, განაცხადა, რომ ბენდუქიძის დანიშვნა „ხელს შეუწყობს რუსეთ-საქართველოს ეკონომიკური ურთიერთობების გაძლიერებას“.
წარმოშობით ქართველი რუსეთის მოქალაქე კახა ბენდუქიძე საქართველოს ეკონომიკის მინისტრად 1 ივნისს დაინიშნა.
რუსეთის მედიის ცნობით, ბენდუქიძის სიტყვებზე დაყრდნობით, იგი “ულტრა-ლიბერალური ეკონომიკური პოლიტიკის განხორციელებას გეგმავს საქართველოში“.
48 წლის კახა ბენდუქიძე 1990 წლიდან რუსეთში კერძო ბიზნესის სექტორში მოღვაწეობდა. იგი რუსეთის მანქანათმშენებლობის კორპორაციას ხელმძღვანელობდა, რომლის შეკვეთათა საერთო რაოდენობა 1 მილიარდ დოლარს აჭარბებდა.