სააკაშვილი ევროპის საბჭოს გენერალურ მდივანს აკრიტიკებს
პრეზიდენტმა სააკაშვილმა 9 მაისს ბათუმის უნივერსიტეტში გამოსვლისას გააკრიტიკა ევროპის საბჭოს გენერალური მდივანი ვალტერ შვიმერი აჭარაში არსებულ სიტუაციასთან დაკავშირებით 2 მაისს გაკეთებული განცხადების გამო.
განცხადებაში აჭარაში ხიდების აფეთქების ფაქტთან დაკავშირებით ვალტერ შვიმერი აცხადებდა,, „შოკის მომგვრელია, როდესაც საქართველოში ხიდებს აფეთქებენ, რადგანაც ცენტრალურმა და ადგილობრივმა [აჭარის] ხელისუფლებამ დაკარგეს დიალოგის უნარი“. აჭარის ყოფილმა ლიდერმა ასლან აბაშიძემ აჭარაში დანარჩენ საქართველოსთან დამაკავშირებელი სამი ხიდი ააფეთქა.
„ეს არ იყო ნამდვილი ევროპელის განცხადება; ეს თავხედი და მაღალხელფასიანი ბიუროკრატის განცხადება იყო“, – განაცხადა სააკაშვილმა 9 მაისს.
„მისი [ვალტერ შვიმერის] განცხადება, რომ ორივე მხარემ [ცენტრალურმა ხელისუფლებამ და აბაშიძის რეჟიმმა] დაკარგეს დიალოგის უნარი, ნიშნავს თითქოს ორივე მხარე თანაბრად პასუხისმგებელი იყო იმაზე, თუ რაც ხდებოდა აჭარაში“, – აღნიშნა პრეზიდენტმა.
ცოტა ხნის წინ საგარეო საქმეთა მინისტრმა სალომე ზურაბიშვილმა ასევე გააკრიტიკა ევროპის საბჭოს გენერალური მდივნის განცხადება და მას „არაკორექტული“ უწოდა.
ასლან აბაშიძის საქართველოდან გამგზავრების შემდეგ ვალტერ შვიმერმა 6 მაისს კმაყოფილება გამოთქვა იმის თაობაზე, რომ აჭარის კრიზისი უსისხლოდ დასრულდა.
საქართველოში აკრედიტირებული ევროპელი დიპლომატები 9 მაისს „ევროპის დღის“ აღსანიშნავად ბათუმს ეწვივნენ.
პრეზიდენტმა სააკაშვილმა ბათუმის უნივერსიტეტში განაცხადა, რომ ბოლო ექვსი თვის განმავლობაში ორი უსისხლო რევოლუციით საქართველომ დაამტკიცა, რომ „ქართველები საუკეთესო ევროპელები არიან“.
