“რევოლუციური გარდაქმნები რევოლუციის გარეშე”
ნინო ბურჯანაძემ წინასაარჩევნო პროგრამა წარმოადგინა პრეზენტაციას საზოგადოების ფართო სპექტრი ესწრებოდა. მათ შორის იყვნენ ოპოზიციური პარტიების წარმომადგენლები, ქართული ინტელიგენციის ცნობილი სახეები, სახელმწიფო სტრუქტურების წარმომადგენლები, არასამთავრობო ორგანიზაციების, დიპლომატიური კორპუსის და საერთაშორისო დონორი ორგანიზაციების წარმომადგენლები. მიწვევის მიუხედავად, აჭარის დეპუტაცია პრეზენტაციას არ დაესწრო. ბურჯანაძის საარჩევნო პროგრამის პრეზენტაციას ასევე არ ესწრებოდნენ სახელისუფლებო ბლოკის წარმომადგენლები. “მე არ გავუგზავნე სახელისუფლებო ბლოკს მოსაწვევები, რადგან ვფიქრობ ისინი არ გაიზიარებენ ამ პრინციპებს”, – განაცხადა ნინო ბურჯანაძემ. “რევოლუციური გარდაქმნები რევოლუციის გარეშე – ეს არის გზა ერთიან ძლიერ სახელმწიფომდე”, – განაცხადა პრეზენტაციაზე ნინო ბურჯანაძემ. ის ზოგადი პრინციპები, რომლის გარშემოც ნინო ბურჯანაძე არჩევნებისთვის თანამოაზრეთა გუნდის შემოკრებას გეგმავს, ქვეყნისთვის ყველა სასიცოცხლო სფეროს მოიცავს. კონსტიტუციური რეფორმის განხორციელება და გუნდური პასუხისმგებლობით მოქმედი მინისტრთა კაბინეტის შემოღება; ტერიტორიული მთლიანობის აღდგენა; დასავლეთზე ორიენტირებული საგარეო პოლიტიკური კურსი; ცენტრალური და ადგილობრივი ბიუროკრატიის, აგრეთვე მმართველობისა და თვითმმართველობის ორგანოების უფლებამოსილებათა გამიჯვნა და პასუხისმგებლობის გადანაწილება; არსებული სახელფასო და საპენსიო დავალიანებათა სასწრაფო გასტუმრება; საინვესტიციო გარემოს გაჯანსაღება, მეწარმეთა ხელშეწყობა და დაცვა მთავრობის უკანონო ქმედებებისა და კრიმინალური სამყაროსაგან; ქართული არმიის ნატო-ს სტანდარტებთან მიახლოება – ეს ნაწილია იმ პრინციპებისა, რომელიც ნინო ბურჯანაძის სამოქმედო გეგმას განსაზღვრავს. ბურჯანაძე საარჩევნო პროგრამაში განსაკუთრებულ მნიშვნელობას ტერიტორიული მთლიანობის აღდგენას უთმობს და აცხადებს, რომ “დემოკრატიული სახელმწიფო [კონფლიქტის მოგვარებაში] უპირატესობას მშვიდობიან გზას უნდა ანიჭებდეს. მაგრამ მშვიდობიანი მოლაპარაკებების რესურსის ამოწურვის შემთხვევაში, ეროვნული ინტერესის დაცვისთვის მზად უნდა ვიყოთ ერთიანობის ძალისმიერი გზით დასაცავად.” “ეს პრინციპები ძალიან ბევრი ადამიანისათვის მისაღებია, ეს ის არის, რასაც თითოეული ჩვენთაგანი ფიქრობს და განიცდის, იმ გუნდს, რომელიც მეტნაკლებად უკვე არსებობს კიდევ მეტი ღირსეული ადამიანი შეემატება”, – აცხადებს პარლამენტის თავმჯდომარე. ნინო ბურჯანაძემ ამ პრინციპების განსახორციელებლად ოპოზიციას კვლავ მოუწოდა გაერთიანებისაკენ. “ხელისუფლებამ ომი გამოაცხადა დემოკრატიული ფასეულობების, ოპოზიციური აზრის და განსხვავებული აზრის წინააღმდეგ. იმედი მაქვს, რომ ომის გამოცხადება ჩვენ ყველას გვაიძულებს, რომ გავერთიანდეთ სხვადასხვა ფორმით, ეს შეიძლება იყოს თანამოაზრეთა ერთმანეთის გვერდში დგომა დემოკრატიული, თავისუფალი და ღირსეული საქართველოსათვის”, – განაცხადა ნინო ბურჯანაძემ დასასრულს. პარლამენტის თავმჯდომარემ კონკრეტული პოლიტიკური ძალები, რომელთან ერთადაც ამ პრინციპების რეალიზაციას აპირებს, ჯერ არ დაასახელა. “კონკრეტულად მეორე ეტაპზე”, – განაცხადა მან. მეორე ეტაპამდე კი ნინო ბურჯანაძე გამოხმაურებებს დაელოდება. “გამოვხატავთ პატივისცემას გამოკვეთილი პოლიტიკური ლიდერის ნინო ბურჯანაძის მიმართ, მაგრამ ჩვენი გუნდი დამოუკიდებლად აპირებს არჩევნებში მონაწილეობას და რაიმე გაერთიანებაზე არ არის საუბარი”, – განაცხადა “ახალი მემარჯვენეების” წარმომადგენელმა დავით კოღუაშვილმა. “ახალმა მემარჯვენეებმა” პარტიის მეორე ყრილობაზე მიიღეს გადაწყვეტილება ნოემბრის საპარლამენტო არჩევნებზე დამოუკიდებლად გამოსვლის თაობაზე. “არჩევნებამდე ორი თვით ადრე ახალ პოლიტიკურ გაერთიანებაზე საუბარი უპერსპექტივოდ მეჩვენება, ისე, “ნაციონალური მოძრაობის” კარი მუდამ ღიაა ნინო ბურჯანაძისთვის”, – აცხადებს “ნაციონალური მოძრაობის” ერთ-ერთი ლიდერი კოტე კემულარია. “ჩვენ ჩვენი გეგმა გვაქვს, ქალბატონმა ნინომ კი თავისი წარმოადგინა, თუ მათი შეჯერება მოხერხდება, პოლიტიკურ თანამშრომლობას ვერაფერი შეუშლის ხელს”, – განაცხადა “ტრადიციონალისტთა” ლიდერმა აკაკი ასათიანმა. ასეთივე პოზიციას აფიქსირებს “გაერთიანებული დემოკრატების” წარმომადგენელი ვასილ მაღლაფერიძეც. დღესდღეობით ნინო ბურჯანაძის გვერდით ოფიციალურად არც ერთი პოლიტიკური ძალა არ დგას. თუმცა, მიუხედავად ოპოზიციონერთა განცხადებებისა, პრინციპების გარშემო გაერთიანების სურვილი უახლოეს მომავალში შესაძლოა ღიად გაცხადდეს. დამკვირვებლები მიიჩნევენ, რომ არჩევნების გზით რეალური ცვლილებების მიღწევას ოპოზიცია მხოლოდ გაერთიანების გზით შეძლებს. ნინო ხუციძე, სივილ ჯორჯია
8 აგვისტოს პარლამენტის თავმჯდომარემ ნინო ბურჯანაძემ თავისი საარჩევნო პროგრამა წარმოადგინა, თუმცა, საზოგადოებაში არსებობდა მოლოდინი, რომ ბურჯანაძის საარჩევნო პრინციპების გამოქვეყნება დიდი ოპოზიციური გაერთიანების საფუძველი გახდებოდა, ჯერ-ჯერობით არ გამართლდა.
რაც შეეხება “ნაციონალურ მოძრაობას”, ამ ეტაპზე ისინი თავად ეპატიჟებიან პარლამენტის თავმჯდომარეს საკუთარ გუნდში. გაერთიანებული ოპოზიციის ლიდერობაზე საკუთარ პრეტენზიებს “ნაციონალური მოძრაობის” ლიდერის მიხეილ სააკაშვილიც აცხადებს, რაც ბურჯანაძის გარშემო გაერთიანების იდეას ეწინააღმდეგება. გაერთიანების თემამ ნინო ბურჯანაძესა და მიხეილ სააკაშვილს შორის მცირე უთანხმოებაც კი გამოიწვია ორიოდე თვის წინ.