პრეზიდენტის მომხრეები სააკაშვილს სახელმწიფო გადატრიალების მოწყობის მცდელობაში ადანაშაულებენ

(თბილისი, 15 მაისი, “სივილ ჯორჯია”) – “მიხეილ სააკაშვილის წინასაარჩევნო ლოზუნგი “თბილისი შევარდნაძის გარეშე” მოსახლეობისთვის სახელმწიფო გადატრიალების მოწყობისკენ მოწოდებაა”, – განაცხადა “მოქალაქეთა კავშირის” პროპრეზიდენტული ჯგუფის ერთ-ერთმა ლიდერმა გელა კვარაცხელიამ.

15 მაისს გამართულ პრესკონფერენციაზე კვარაცხელიამ “ახალ ნაციონალურ მოძრაობას” მიხეილ სააკაშვილის მეთაურობით “ფაშისტური მოძრაობა” უწოდა.

სააკაშვილმა 14 მაისს, ამომრჩევლებთან შეხვედრისას განაცხადა, რომ “ახალი ნაციონალური მოძრაობის” ლოზუნგია “თბილისი შევარდნაძისა და მისი კლანის გარეშე”.

კვარაცხელიას თქმით, მისი მომხრეები სარჩელის შეტანას აპირებენ სასამართლოში სააკაშვილის წინააღმდეგ მოსახლეობისთვის გადატრიალების მოწყობისკენ მოწოდებების გამო.