Placeholder canvas
ახალი ამბები

ჩვენ ოპოზიციაში ვართ

გიორგი ბარამიძე – ფრაქცია მოქალაქეთა კავშირის წევრი.
პარლამენტის თავდაცვისა და უშიშროების კომიტეტის თავმჯდომარე.

დაიბადა:
1968 წლის 5 იანვარს, ქ. თბილისში.
                ჰყავს მეუღლე და შვილი.

განათლება:
1992 წელს – დაამთავრა საქართველოს ტექნიკური უნივერსიტეტის ქიმიური ფაკულტეტი;
1995 წელს – ევროპის უსაფრთხოებისა და თავდაცვითი ეკონომიკის ცენტრი (გერმანია);
1999 წელს – ჯორჯთაუნის უნივერსიტეტის დიპლომატიური სკოლა (აშშ).

საქმიანობა:
1992 წელს –  მუშაობდა საქართველოს ადამიანის უფლებათა დაცვისა და ეროვნებათშორისო ურთიერთობების სახელმწიფო კომიტეტში, სამმართველოს უფროსად.
1992-1995 წწ. – იყო პარლამენტის წევრი;
1995-1999 წწ. – იყო პარლამენტის წევრი;

საქართველოსთვის პრიორიტეტულ სფეროებად მიაჩნია:
საქართველოს ტერიტორიული მთლიანობა;
აღმასრულებელი სტრუქტურების საკონსტიტუციო რეფორმა;
რუსეთის ბაზების გაყვანა საქართველოდან;
მრეწველობის განვითარება;
ადამიანის უფლებების დაცვა;
განათლებისა და მეცნიერების რეფორმა.

—————————–

გივი ორდენიძე, “სივილ ჯორჯია” (გ.ო.): ბატონო გია როგორ კომენტარს გაუკეთებდით ფრაქცია მოქალაქეთა კავშირის შიგნით შექმნილ ამჟამინდელ ვითარებას.

გია ბარამიძე (გ.ბ.): პირველ რიგში უნდა აღინიშნოს, რომ ჩვენმა წევრებმა ფაქტიურად დატოვეს აღმასრულებელი ხელისუფლება. ისინი წამოვიდნენ, რადგან ვერ დაინახეს ვერანაირი საშუალება იმ გეგმების განხორციელებისა, რომელიც “მოქალაქეთა კავშირს” წინასაარჩევნო პერიოდში ჰქონდა. ბუნებრივია, რომ ისეთ ხელისუფლებაში, რომელიც თვითონ არის კორუფციის სათავე ჩვენი გუნდის წევრები ვერ გაჩერდებოდნენ. მითუმეტეს, რომ მხარდაჭერის მაგივრად ხელისუფლების სხვა წარმომადგენლების მხრიდან იყო გაუთავებელი წინააღმდეგობები.

საერთოდ პრობლემა არის ის, რომ ამ მთავრობაში არიან როგორც მინიმუმ ორი მსოფლმხედველობის ადამიანები.

გ.ო.: საკანონმდებლო ხელისუფლებაში ძალიან ძნელია, ბრძოლა თუ არა გაქვს გარკვეული მხარდაჭერა აღმასრულებელი ხელისუფლებიდან, აქედან გამომდინარე ძალთა როგორ გადანაწილებას ელით პარლამენტში?

გ.ბ.: ძალთა გადანაწილება იქნება შემდეგი: მოხდება გაყოფა, ის ხალხი რომელიც თვლის, რომ ერთგული უნდა დარჩეს იმ პროგრამისა, რომელიც ქონდა მოქალაქეთა კავშირს იქნება ერთ გუნდში და მეორე ნაწილი იქნება ის ვინც პრეზიდენტის პოლიტიკას დაუჭერს მხარს, იმისდა მიუხედავად სწორია თუ არა თავად ეს პოლიტიკა.

გ.ო.: ე.ი. თქვენ არ გამორიცხავთ ფრაქციის გაყოფას?

გ.ბ.: არ გამოვრიცხავ კი არა ვთვლი, რომ გარდაუვალი და საჭიროც არის.

გ.ო.: და ვინ დარჩება “მოქალაქეთა კავშირის” სახელის ქვეშ?

გ.ბ.: მე ვფიქრობ რომ ჩვენ ამ შემთხვევაში დასათმობი არაფერი გვაქვს, ჩვენ ფრაქციის წინასაარჩევნო პროგრამის ერთგულები ვრჩებით. ქვეყანაში კი პროცესები მიდის ამ პროგრამის საპირისპიროდ, და ამ კატასტროფისაკენ მიმავალ გზას სათავეში უდგას პრეზედენტი. პრეზიდენტი წავიდა პარტიის თავჯდომარეობიდან, ჩვენ ხომ არ წავსულვართ? იმედია იგივეს გააკეთებს ის ხალხიც, ვინც მიუხედავად იმისა თუ რა ხდება ქვეყანაში მაინც პრეზიდენტის პოლიტიკას უჭერს მხარს. რაც მალე მოხდება გაყოფა, მით უფრო სასარგებლო იქნება იმისთვის რომ რაღაც ჯანსაღი გამოჩნდეს ამ ქვეყანაში. ოპოზიცია, რომელიც თავის თავს ოპოზიციას ეძახის, ძალიან კარგად გამოჩნდა რომ არის ასლან აბაშიძის გარშემო შემოკრებილი და აბაშიძეს და შევარდნაძეს კი ერთიანი შეთანხმებული პოლიტიკა აქვთ, ფაქტი სახეზეა.

ამ ქვეყანაში უნდა იყოს ძალა, რომელიც ამბობს სიმართლეს და აი ამ სიმართლის მიხედვით მოქმედებს პოლიტიკაში. რა თქმა უნდა, სასურველია, რომ მას ჰქონდეს ბერკეტები აღმასრულებელ ხელისუფლებაში, მაგრამ ეს ბერკეტები არა აქვს, იმიტომ რომ აღმასრულებელი ხელისუფლების წარმომადგენლები აბსულუტურად სხვა მიმართულებით მიდიან. რას ვიზამთ, ვიქნებით მხოლოდ პარლამენტში.

გ.ო.: ესეიგი არ გამორიცხავთ, რომ ოპოზიციაშიც აღმოჩნდეთ.

გ.ბ.: არათუ არ გამოვრიცხავ არამედ ფაქტიურად დღეს ეს გუნდი, რაც გინდათ ის დაარქვით, მაგრამ ვართ ოპოზიციაში.

(ამ დროს ტელეფონზე ურეკავს ფრაქცია “ტრადიციონალისტის” წევრი მაია ნადირაძე)

გ.ო.: ბატონო გია, ხომ არ გამორიცხავთ თქვენი ჯგუფის გაერთიანებას ფრაქცია “ტრადიციონალისტთან” და “მრეწველებთან”?

გ.ბ.: არა არანაირად არ გამოვრიცხავთ, პირიქით ჩვენ არაერთხელ გაგვიცხადებია, რომ ამ ძალებთან ჩვენ შევძლებთ საერთო ენის გამონახვას. ეს ძალები არ არიან უშუალოდ იმ პოლიტიკის ზეგავლენის ქვეშ, რომელსაც აბაშიძე და შევარდნაძე ერთად ატარებენ, ანუ არ არიან უშუალო მითითებების შემსრულებლები ამ შემთხვევაში.

გ.ო.: ამ სავარაუდო პარტნიორების ხარჯზე, ხომ არ მიიჩნევთ რომ შესაძლებელია პარლამენტში ახალი უმრავლესობის ჩამოყალიბება?

გ.ბ.: არის შესაძლებელი.

სხვა ძალასთან გაერთიანება და უმრავლესობის შექმნა არის ყველა საღად მოაზროვნე პოლიტიკური ძალის ინტერესი. ბუნებრივია ჩვენც ვეცდებით ამ მიმართულებით წავიდეს პორცესი. ეს კი იმაზეა დამოკიდებული თუ რამდენად ბევრნი იქნებიან ისეთი დეპუტატები რომლებიც გაბედავენ და არ დაადგებიან აბაშიძე-შევარდნაძის გზას (უმრავლესობისათვია საჭიროა 118 და მეტი პარლამეტარი/ხმა საკანონმდებლო ორგანოში).

გ.ო.: გავრცელდა ინფორმაცია, რომ რუსეთის ინტერესებში შედის საქართველოში რეფორმატორთა გუნდის დასუსტება. რუსეთში მუსირებდა ის აზრიც, რომ შევარდნაძე და პუტინი მშვენივრად უგებენ და უფრო გაუგებდნენ ერთმანეთს, რომ არა რეფერმატორები, რომლებიც ტვინს ურევენ პრეზიდენტს.

გ.ბ.: მე არ ვიცი ვინ რას ლაპარაკობს, მაგრამ ერთი რამ ცხადია: ასლან აბაშიძე არის რუსეთის პოლიტიკისა და ინტერესების გამტარებელი საქართველოში, ამის არაერთი დამადასტურებელი ფაქტი ყოფილა. აბაშიძე და შევარდნაძე კი აბსოლუტურად შეთანხმებულ პოლიტიკას აწარმოებენ.

გ.ო.: და ბოლოს თუ ფიქრობთ რომ ზეწოლა მოახდინოთ პრეზიდენტზე რათა ის გადადგეს, რის შემდეგაც პრეზიდენტის მოვალეობის შემსრულებელი ჟვანია გახდება?

გ.ბ.: ამაზე მე კომენტარს ვერ გავაკეთებ.  

მსგავსი/Related

Back to top button