ლარი რეკორდულ გაუფასურებას განაგრძობს

ეროვნული ბანკის მონაცემებით, 13 დეკემბრის ვაჭრობის შედეგად აშშ დოლართან მიმართებაში ლარის ოფიციალურმა გაცვლითმა კურსმა 2.6599 შეადგინა, რაც თითქმის 4.5 პუნქტიანი გაუფასურებაა წინა დღეს არსებულ 2.6154-თან შედარებით.

ლარი ასევე დაეცა ევროსთან მიმართებაშიც და ოფიციალურმა გაცვლითმა კურსმა სამშაბათს გამართული ვაჭრობის შედეგად 2.8222 შეადგინა, რაც წინა დღესთან შედარებით 5 პუნქტზე ოდნავ მეტი გაუფასურებაა.

ვალუტის გადამცვლელ ჯიხურებში ლარის გაცვლითი კურსი დოლართან მიმართებაში 2.68-2.70 შორის მერყეობს, ხოლო ერთი ევროს შეძენა დაახლოებით 2.85 ლარად არის შესაძლებელი.

მას შემდეგ, რაც აშშ დოლართან მიმართებაში ოფიციალური კურსი 25 ნოემბერს ისტორიულ მინიმუმამდე  – 2.5026-იან ნიშნულზე დაეცა, ეროვნული ვალუტა გაუფასურებას თითქმის ყოველდღიურად განაგრძობს.

ეკონომიკის მინისტრმა გიორგი გახარიამ ლარის ბოლოდროინდელი გაუფასურება გარე ფაქტორებით ახსნა.  „ეს არის მოკლევადიანი თემა, ჩვენ ველოდებით დასტაბილურებას“, – განაცხადა მან.

ფინანსთა მინისტრმა დიმიტრი ქუმსიშვილმა 13 დეკემბერს განაცხადა, რომ სახელმწიფო ბიუჯეტის ხარჯვას ლარის გაუფასურებაზე არანაირი გავლენა არ აქვს. 

ეროვნულ ბანკს სავალუტო ბაზარზე ინტერვენცია 12 ოქტომბრის შემდეგ არ განუხორციელებია – მას შემდეგ ლარმა აშშ დოლართან მიმართებაში თავისი ღირებულების 13.8% დაკარგა, ხოლო 2014 წლის ნოემბერთან შედარებით, როცა ლარმა გაუფასურება დაიწყო, დაახლოებით, 51%.

2016 წლის დასაწყისიდან ეროვნულმა ბანკმა 23 ინტერვენციის შედეგად სულ 240 მილიონი აშშ დოლარი გაყიდა და 278.35 მილიონი აშშ დოლარი იყიდა – შესყიდვა, ძირითადად, მარტის შუა პერიოდიდან აგვისტოს ბოლომდე, დოლართან მიმართებაში ლარის გამყარების პარალელურად ხდებოდა.

ნოემბრის მდგომარეობით, საერთაშორისო სავალუტო რეზერვებმა 2.779 მილიარდი აშშ დოლარი შეადგინა; ოქტომბერში ეს მაჩვენებელი 2.760 მლრდ აშშ დოლარი, ხოლო შარშან ნოემბერში, დაახლოებით, 2.479 მლრდ აშშ დოლარი იყო.