ქართული მხარე აფხაზეთში რუსი სამშვიდობოების როტაციას აპროტესტებს
საქართველოს ხელისუფლება პროტესტს გამოთქვამს აფხაზეთის კონფლიქტის ზონაში რუსი სამშვიდობოების თბილისთან შეუთანხმებელი როტაციის გამო.
”ქართული მხარისათვის უცნობია რუსეთის არმიის რა რაოდენობის ცოცხალი ძალა და ტექნიკა შემოდის კონფლიქტის ზონაში დსთ-ს მშვიდობის მხარდამჭერი კოლექტიური ძალების საფარქვეშ,”- აცხადებს კონფლიქტების მოგვარების საკითხებში სახელმწიფო მინისტრის აპარატი, ”რუსული სამხედრო ტექნიკისა და ცოცხალი ძალის კონცენტრაცია კონფლიქტის ზონაში დაუშვებელია”.
სააგენტო ”აფსნიპრესის” ცნობით, დსთ-ს კოლექტიური ძალების ”გეგმიური” როტაცია კონფლიქტის ზონაში 6-10 დეკემბერს ხორციელედება.
”აღნიშნული როტაცია ტარდება დსთ-ს კოლექტიური ძალების უმანდატო ყოფილი სარდლის, საქართველოში არასასურველ პირად გამოცხადებული სერგეი ჩაბანის მიერ, რაც ამ როტაციის უკანონობაზე მეტყველებს,”- აცხადებს ქართული მხარე.
სერგეი ჩაბანი ოფიციალურმა თბილისში განმუხურის ინციდენტის შემდეგ არასასურველ პერსონად გამოაცხადა და მისი საქართველოს ტერიტორიიდან გაძევება მოითხოვა, თუმცა 27 ნოემბერს დსთ-ს თავდაცვის მინისტრთა საბჭომ მას მანდატი გაუგრძელა. თბილისმა განაცხადა, რომ ამ გადაწყვეტილებას არანაირი სამართლებრივი შედეგი არ აქვს.