სოფლის მეურნეობის მინისტრი რთველის მიმდინარეობაზე საუბრობს

საქართველოში წელს ყურძნის მოსავალი, დაახლოებით, 200 ათას ტონამდე იქნება, განაცხადა 19 სექტემბერს  სოფლის მეურნეობის მინისტრმა პეტრე ცისკარიშვილმა რთველის მიმდინარეობის შესახებ საუბრისას.

მისი ინფორმაციით, ამ დროისათვის ღვინის ქარხნებმა, რომელთა რაოდენობაც 50-ს აღწევს, უკვე  2 000 ტონა ყურძენი ჩაიბარეს, 800 ტონამდე ყურძენი კი საცალო და საბითუმო ბაზრებზე იყიდება. წინასწარი მონაცემებით, კერძო სექტორიდან, დაახლოებით,  44 ათას ტონა ყურძენზე იქნება მოთხოვნა. 

”ხარისხიანი მოსავალი დაუბინავებელი არ დარჩება”, – განაცხადა ცისკარიშვილმა.

მთავრობა რთველის ღონისძიებებზე 5 მლნ ლარზე მეტი თანხის გამოყოფას გეგმავს საბიუჯეტო ცვლილებების ფარგლებში.

რთველის საკითხმა განსაკუთრებული აქტუალობა მას შემდეგ შეიძინა, რაც 2006 წლის გაზაფხულზე საქართველომ რუსულ ბაზარზე გასვლის შესაძლებლობა დაწესებული ემბარგოს გამო დაკარგა.