საკონსტიტუციო ცვლილებების პროექტი ინიცირებულია
საქართველოს კონსტიტუცია. ფოტო: იანა ყორბეზაშვილი/Civil.ge
საქართველოს პარლამენტში 1 მაისს საკონსტიტუციო ცვლილებების პროექტის ინიცირება მოხდა, რომლის მიხედვითაც პირდაპირი საპრეზიდენტო არჩევნები უქმდება, ხოლო ქვეყნის საკანონმდებლო ორგანო პროპორციული სისტემით აირჩევა.
დეპუტატები 3 მაისს კენჭს უყრიან ცხრაწევრიანი საორგანიზაციო კომისიის შექმნას, რომელიც საკონსტიტუციო ცვლილებების შემოთავაზებულ პროექტზე ერთთვიან საჯარო განხილვას უხელმძღვანელებს.
პარლამენტის თავმჯდომარემ ირაკლი კობახიძემ, რომელიც ამავდროულად საკონსტიტუციო კომისიის თავმჯდომარეა, განაცხადა, რომ ცვლილებების პროექტი უკვე გაეგზავნა ვენეციის კომისიას, რომელიც წინასწარ დასკვნას ივნისამდე, საპარლამენტო განხილვების დაწყებამდე, ხოლო საბოლოო დასკვნას 15 ივნისს გამოაქვეყნებს.
სანაცვლოდ, კონსტიტუციის პროექტით, იქმნება ეროვნული თავდაცვის საბჭო, რომელიც საომარი მდგომარეობის დროს კონსტიტუციური ორგანოების საერთო კოორდინაციას განახორციელებს.
ეროვნული თავდაცვის საბჭოს მუდმივი წევრები იქნებიან საქართველოს პრეზიდენტი, პრემიერ-მინისტრი, პარლამენტის თავმჯდომარე და საქართველოს სამხედრო ძალების მეთაური. საარჩევნო სისტემა დამტკიცების შემთხვევაში, საქართველო მთლიანად პროპორციულ საარჩევნო სისტემაზე გადავა, ნაცვლად ამჟამად არსებული შერეული სისტემისა, როცა 77 დეპუტატი 150-წევრიან პარლამენტში პროპორციული წესით აირჩევა იმ პარტიების სიებიდან, რომლებიც 5%-იან ბარიერს დაძლევენ, ხოლო დანარჩენი 73 მაჟორიტარი, ერთმანდატიან ოლქებში აირჩევა. ახალი კონსტიტუცია კრძალავს ბლოკების ჩამოყალიბებას არჩევნების წინ იმ ფონზე, როდესაც უცვლელი რჩება 5%-იანი საარჩევნო ბარიერი. იმ პარტიების ხმებს, რომლებიც ბარიერს ვერ გადალახავენ, მთლიანად გამარჯვებული პარტია მიიღებს. პროექტის მიხედვით, არსებული 21 წლიდან 25 წლამდე იზრდება დეპუტატობის კანდიდატის ასაკი. ცვლილებების თანახმად, არჩევნებში მონაწილეობის უფლება აქვს პოლიტიკურ პარტიას, რომელსაც ჰყავს მისი წარდგენით არჩეული პარლამენტის წევრი არჩევნების დანიშვნის დროისათვის ან რომლის მხარდაჭერა ორგანული კანონით დადგენილი წესით დადასტურებულია 25 000 ამომრჩევლის ხელმოწერით. პროექტის თანახმად, ერთი პოლიტიკური პარტიის წარდგენით არჩეულ პარლამენტის წევრებს უფლება აქვთ გაერთიანდნენ მხოლოდ ერთ ფრაქციაში. სხვა დებულებები კონსტიტუციის პროექტით, გარდამავალი დებულებების 78-ე მუხლის თანახმად, „კონსტიტუციურმა ორგანოებმა თავისი უფლებამოსილების ფარგლებში უნდა მიიღონ ყველა ზომა ევროპის კავშირისა და ჩრდილოატლანტიკური ხელშეკრულების ორგანიზაციაში საქართველოს სრული ინტეგრაციის უზრუნველსაყოფად“. კონსტიტუციის პროექტი აღარ შეიცავს პუნქტს ქუთაისში პარლამენტის მდებარეობის თაობაზე. პროექტის თანახმად, „ყველას აქვს ინტერნეტზე წვდომისა და ინტერნეტით თავისუფალი სარგებლობის უფლება“. ცვლილებების პროექტი ასევე მოიცავს ქორწინების განსაზღვრებას, რომლის თანახმადაც ქორწინება არის „ქალისა და მამაკაცის კავშირი ოჯახის შექმნის მიზნით“. ახალი კონსტიტუციის თანახმად, პროკურატურა აღარ დაექვემდებარება იუსტიციის სამინისტროს, ის დამოუკიდებელი ორგანო გახდება და პარლამენტის წინაშე იქნება ანგარიშვალდებული. ამ ორგანოს პარლამენტის მიერ ექვსი წლის ვადით არჩეული მთავარი პროკურორი უხელმძღვანელებს. პროექტი ასევე განმარტავს, რომ ომბუდსმენად ერთი და იმავე პირის ხელმეორედ არჩევა დაუშვებელია. კონსტიტუციის პროექტით, სახელმწიფო უფლებამოსილია კანონით დააწესოს უცხო ქვეყნის მოქალაქეთა და მოქალაქეობის არმქონე პირთა პოლიტიკური საქმიანობის შეზღუდვა.This post is also available in: English (ინგლისური)