NDI-ის დაკვეთით ჩატარებული საზოგადოებრივი აზრის კვლევა
აშშ-ის ეროვნულ დემოკრატიულმა ინსტიტუტმა (NDI) ორშაბათს საზოგადოებრივი აზრის კვლევა გამოაქვეყნა, რომელიც 4 ნოემბრიდან 4 დეკემბრამდე პერიოდში ჩატარდა და საკითხთა ფართო სპექტრის, მათ შორის საგარეო პოლიტიკის მიმართ რესპოდენტების განწყობებს აჩვენებს.
ოქტომბრის საპარლამენტო არჩევნების შემდეგ გამოკითხულთა 27%-მა განაცხადა, რომ ქვეყანა "არასწორი მიმართულებით" ვითარდება, რაც ივნისის ანალოგიურ კვლევასთან (33%) შედარებით 6 პროცენტული პუნქტით არის შემცირებული – მარტში ეს მაჩვენებელი 39% იყო, 2015 წლის ნოემბერში 45%, ხოლო 2015 წლის აპრილში 37%.
ივნისთან შედარებით 7 პროცენტული პუნქტით არის გაზრდილი და 32%-ს შეადგენს იმ რესპოდენტთა რაოდენობა, ვინც თვლის, რომ ქვეყანა „სწორი“ მიმართულებით ვითარდება. ასევე, ივნისში არსებული 34%-დან ნოემბერში 36%-მდე მცირედით გაზრდილია მათი რიცხვი, ვისთვისაც „საქართველო საერთოდ არ იცვლება“.
კვლევა კავკასიის კვლევითი რესურსების ცენტრმა შვედეთის განვითარების სააგენტოს დაფინანსებით აწარმოა, რომლის ფარგლებშიც წარმომადგენლობითი შერჩევის საფუძველზე 3 141 რესპოდენტი გამოიკითხა. NDI-ის დაკვეთით ჩატარებული ამ კვლევის ცდომილების ზღვარი +/-1.8%-ს შეადგენს.
რესპოდენტთა 56% ქართული ოცნების ოთხწლიანი მმართველობისა და ხელახლა არჩევის შემდეგ აცხადებს, რომ 2012 წლის ოქტომბრიდან ხელისუფლების შეცვლის შემდეგ „იგივე მდგომარეობაშია“. მხოლოდ 17% აღნიშნავს უკეთესობას, ხოლო 26% მდგომარეობის გაუარესებაზე მიუთითებს.
გამოკითხულთა 33% ოპტიმისტურად არის განწყობილი, რომ მომდევნო ერთი წლის განმავლობაში ეკონომიკურ მდგომარეობას გაიუმჯობესებს, 12% გაუარესებას ელის, ხოლო 38% ფიქრობს, რომ იგივე დარჩება – ასე ივნისში 44% ფიქრობდა, დადებითი მოლოდინი 26%-ს, უარყოფითი კი 10%-ს ჰქონდა.
ყველაზე აქტუალურ საკითხებს შორის დასაქმება (58%), ინფლაცია (38), სიღარიბე (30%), ტერიტორიული მთლიანობა (27%) და პენსიები (24%) დასახელდა – პრობლემური საკითხების ეს ხუთეული ბოლო წლებში არ შეცვლილა და სხვადასხვა თანამიმდევრობით იყო წარმოდგენილი წინა ანალოგიურ კვლევებშიც.
საგარეო პოლიტიკა
ივნისთან შედარებით 72%-ზე უცვლელი დარჩა იმ რესპონდენტების რაოდენობა, ვინც მხარს უჭერს ხელისუფლების გაცხადებულ მიზანს ქვეყნის ევროკავშირში გაწევრიანების თაობაზე – მარტში ეს მაჩვენებელი 77%-ს შეადგენდა. ევროკავშირისადმი დადებითი განწყობა ყველა ტიპის დასახლებებში მაღალია და ამ კუთხით გამონაკლისი, კვლევის თანახმად, მხოლოდ უმცირესობათა დასახელებებია 47%-იანი მაჩვენებლით (ივნისში 50%).
ევროკავშირისგან განსხვავებით, ივნისთან შედარებით 68%-დან 61%-მდეა შემცირებული იმ რესპოდენტების რაოდენობა, ვისთვისაც მისაღებია მთავრობის გაცხადებული მიზანი საქართველო გახდეს ნატოს წევრი. ამ მიზანს 25% ეწინააღმდეგება.
ამასთან, ნატოში გაწევრიანების მიმართ მხარდაჭერა ივნისში არსებული 47%–დან ნოემბერში 39%-მდე შემცირდა იმ რესპონდენტებს შორის, რომლებიც ეთნიკური უმცირესობებით დასახლებულ რაიონებში ცხოვრობენ.
კითხვაზე, თუ როგორი უნდა იყოს საქართველოს საგარეო პოლიტიკა, 54%–მა (ივნისში – 48%; მარტში – 52%) უპასუხა „პროდასავლური, თუმცა უნდა შეინარჩუნოს კარგი ურთიერთობა რუსეთთან“.
ამავე კითხვას 18%-მა (ივნისში – 20%; მარტში – 16%) უპასუხა, რომ „პრორუსული, თუმცა უნდა შეინარჩუნოს კარგი ურთიერთობა ევროკავშირთან და ნატოსთან“.
რესპონდენტების 12%–მა, რაც სტატისტიკურად იგივეა რაც ივნისში, აირჩია პასუხი: „პროდასავლური“, ხოლო 9%–მა – „პრორუსული“, რაც 3 პროცენტული პუნქტით არის გაზრდილი ივნისის შემდეგ.
კვლევის თანახმად, 53% ფიქრობს, რომ საქართველო მეტ სარგებელს მიიღებს ევროპული და ევროატლანტიკური ინტეგრაციით; 31%-ის აზრით კი მეტი სარგებელი იქნება, თუ რუსეთთან უკეთესი ურთიერთობების სანაცვლოდ, ქვეყანა უარს იტყვის ევრო-ატლანტიკურ ინტეგრაციაზე.
ადგილობრივი თვითმმართველობა
2017 წლის ოქტომბერში დაგეგმილი ადგილობრივი თვითმმართველობის არჩევნებამდე დაახლოებით ერთი წლით ადრე, რესპოდენტთა 49% აცხადებს, რომ ადგილობრივი მთავრობა მნიშვნელოვან ცვლილებებს ახორციელებს, 46% კი საპირისპირო პოზიციაზეა. ქვეყნის მასშტაბით ადგილობრივ თვითმმართველობის ორგანოებს – საკრებულოებს, მერიებსა და გამგეობებს მმართველი პარტია ქართული ოცნება აკონტროლებს.
გამოკითხულთა 37% აცხადებს, რომ კმაყოფილი ან ძალიან კმაყოფილია საკრებულოს მუშაობით; 23% უკმაყოფილო ან ძალიან უკმაყოფილოა, ხოლო 38%-ს არ აქვს პასუხი. მერიის მუშაობას 33% კმაყოფილებით აღნიშნავს, 27%-ს უარყოფითი პოზიცია აქვს, 40%-მა კი „არ იცის“.
თბილისში გამოკითხული რესპოდენტების 33% მერიის მუშაობით კმაყოფილია, 34% უკმაყოფილო და 33%-ს არ აქვს ჩამოყალიბებული პოზიცია. ქუთაისის მერიას უფრო მეტი უკმაყოფილო (39%) ჰყავს, ვიდრე კმაყოფილი (36%). ბათუმში, ზუგდიდსა და ახალციხეში კი მერიის მუშაობით კმაყოფილი რესპოდენტები ჭარბობენ, თუმცა აქაც მაღალია მათი რიცხვი, ვისაც არ აქვს გამოკვეთილი პოზიცია.
ამ კვლევის მეორე ნაწილის გამოქვეყნებას, რომელიც პარტიულ რეიტინგებს მოიცავს, NDI-ი ოთხშაბათისთვის გეგმავს.
This post is also available in: English (ინგლისური) Русский (რუსული)
