პრეზიდენტის თქმით, კამპანია ოფიციალურად 8 ოქტომბრის არჩევნებამდე ოთხი თვით ადრე დაიწყება

პრეზიდენტმა გიორგი მარგველაშვილმა განაცხადა, რომ 8 ოქტომბრის არჩევნებისთვის კამპანია ოფიციალურად  8 ივნისს დაიწყება და ოთხი თვის განმავლობაში გაგრძელდება. 

ამ განცხადებამდე გიორგი მარგველაშვილმა 10 მაისს პრეზიდენტის ადმინისტრაციაში უმასპინძლა კონსულტაციებს პრემიერ-მინისტრ გიორგი კვირიკაშვილის, პარლამენტის თავმჯდომარის დავით უსუფაშვილისა და ცესკოს თავმჯდომარის თამარ ჟვანიას მონაწილეობით.

პრეზიდენტის თქმით, ამ კონსულტაციების ფარგლებში შედგა შეთანხება, რომ ის საპარლამენტო და ასევე აჭარის ავტონომიური რესპუბლიკის უმაღლესი საბჭოს არჩევნების დანიშვნის თაობაზე სამართლებრივ აქტებს იმ დროისთვის გამოსცემს, რომ ისინი პრემიერ-მინისტრის მხრიდან კონტრასიგნაციის შემდეგ ძალაში 8 ივნისს შევიდეს, რაც ასევე ავტომატურად ნიშნავს წინასაარჩევნო კამპანიის ოფიციალურ დაწყებას. 

პრეზიდენტმა მარგველაშვილმა საპარლამენტო არჩევნებისა და ასევე აჭარის ავტონომიური რესპუბლიკის უმაღლესი საბჭოს არჩევნები 8 ოქტომბრისთვის თავდაპირველად აპრილის დასაწყისში პრემიერთან კონსულტაციების შემდეგ დანიშნა, თუმცა მთავრობის მეთაურმა შესაბამისი განკარგულებების კონტრასიგნაციაზე უარი თქვა მისი ადმინისტრაციის მხრიდან დაშვებული "იურიდიული ხარვეზის" გამო და პრეზიდენტს მათი ხელახალი გამოცემისკენ ივლისისთვის მოუწოდა, რათა წინასაარჩევნო კამპანიის რეჟიმის ათვლა არჩევნებამდე სამი თვით ადრე დაწყებულიყო. თავდაპირველად პრეზიდენტმა ეს მოწოდება უარყო და განაცხადა, რომ ახალ განკარგულებებს მაისის დასაწყისში გამოსცემდა, რათა საარჩევნო კამპანია ხუთთვიანი ყოფილიყო.

„პრემიერ-მინისტრს სხვა თარიღი ჰქონდა დასახელებული – 8 ივლისი. ჩვენ შევძელით კონსენსუსამდე მისვლა და პრინციპში განვსაზღვრეთ ისეთი საარჩევნო პერიოდი ქართული პოლიტიკური სისტემისათვის – 4-თვიანი საარჩევნო პერიოდი, რომელიც ნამდვილად პასუხობს ამომრჩეველთა მოთხოვნებს და პოლიტიკური ძალებისთვის საკმარის ველს ქმნის წინასაარჩევნოდ“, – განაცხადა პრეზიდენტმა 10 მაისს გამართულ პრესკონფერენციაზე.

პრეზიდენტმა განაცხადა, რომ ხანგრძლივი წინასაარჩევნო კამპანია შესაძლებლობას მისცემს გადაუწყვეტელ ამომრჩეველს, რომ ჩამოყალიბდეს, რომელ პოლიტიკურ პარტიას მისცეს ხმა და შესაბამისად, „უფრო ლეგიტიმური და აქტიური იყოს არჩევნები“. 

„რაც უფრო ადრე დაიწყება წინასაარჩევნო კამპანია და რაც უფრო ადრე გადავლენ პოლიტიკური ძალები რეალურ დიალოგში ამომრჩეველთან, ჩვენ სავარაუდოდ უფრო უკეთესი დასწრება გვექნება არჩევნებზე“, – განაცხადა პრეზიდენტმა.

მისი თქმით, საარჩევნო პროცედურებთან ერთად დღევანდელ კონსულტაციებზე სხვა საკითხებზეც იმსჯელეს, მათ შორის მის მიერ რამდენიმე თვის წინ პარლამენტისთვის დასამტკიცებლად წარდგენილ უზენაესი სასამართლოს მოსამართლეობის სამ კანდიდატზე, რომელთათვისაც დეპუტატებს ჯერ კენჭი არ უყრიათ.

• უზენაესი სასამართლოს მოსამართლეობის კანდიდატები პარლამენტს გადაწყვეტილების მიღებისკენ მოუწოდებენ
• პარტია ქართული ოცნების დეპუტატებსა და პრეზიდენტს შორის ახალი უთანხმოება უზენაესი სასამართლოს წევრობის კანდიდატებთან დაკავშირებით

„ველით დროულ განხილვას მოსამართლეთა კანდიდატურების, რადგანაც ეს პროცესი გაიწელა“, – განაცხადა პრეზიდენტმა, „ამ პროცესის გაწელვა გარკვეულ სირთულეებს უქმნის უზენაეს სასამართლოს, რადგან იქ არის ნაკლებობა მოსამართლეების და ჩვენ მიგვაჩნია, რომ ამ საკითხზე ბოლოს და ბოლოს უნდა შედგეს პარლამენტის გადაწყვეტილება და ვერდიქტი“.     

პრეზიდენტმა მარგველაშვილმა თავდაცვის მინისტრის მოქმედი მოადგილე ანა დოლიძე უზენაესი სასამართლოს წევრობის კანდიდატად თებერვალში წარადგინა, ხოლო მარტში კიდევ ორ ვაკანტურ თანამდებობაზე თამარ ლალიაშვილი და ნონა თოდუა დაასახელა. სამივე კანდიდატთან მიმართებაში საკომიტეტო მოსმენები თითქმის ერთი თვის წინ დასრულდა; მას შემდეგ ეს საკითხი პლენარული სხდომების დღის წესრიგშია შეტანილი.